ޕާޓީތަކާއި ރަސްމިއްޔާތުތައް ބޭއްވުން މަނާކޮށްފި
މާލެ ސަރަހައްދުގައި ކޮވިޑް-19 ފެތުރުން އިތުރުވާތީ ޕާޓީތަކާއި ރަސްމިއްޔާތުތައް ބޭއްވުން މަނާ ކޮށްފިއެވެ.
ކޮވިޑްގެ ކޭސްތައް މަދުވާން ފެށުމުން ، އަޅާފައިވާ ފިޔަވަޅުތަކަށް ލުއި ދިނުމުގެ ފިޔަވަހިތަކުގެ ދަށުން މާލެ ސަރަހައްދުގައި ޕާޓީތަކާއި ރަސްމިއްޔާތުތައް ބޭއްވުމުގެ ހުއްދަ ދީފައިވަނީ މިދިޔަ އަހަރުގެ ފަހުކޮޅުއެވެ.
ނަމަވެސް އަނެއްކާވެސް ކޮވިޑް-19 ގެ ކޭސްތައް އިތުރުވާން ފެށުމުން އެޗްޕީއޭއިން ވަނީ ބައެއް ފިޔަވަޅުތައް އަޅަން ނިންމާފައެވެ. އެގޮތުން މާލެ ސަރަހައްދުގައި ރަސްމިއްޔާތުތަކާއި ޕާޓިތައް ބޭއްވުން މެދުކަނޑާލުމުގެ އިތުރުން ވެސް ވަނީ ބައެއް ފިޔަވަޅު އަޅާފައެވެ. މިގޮތުން،
- 2021 ޖަނަވަރީ 27 ވަނަ ދުވަހުގެ ރޭ 00:12 އިން ފެށިގެން ފަތިހު 00:4 އަށް، މާލެއާއި، ހުޅުމާލެއާއި، ވިލިމާލޭގައި، އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް މީހުން ނުކުތުން މަނާކުރުން.
- މި ހިނދުން ފެށިގެން، މާލެއާއި، ހުޅުމާލެއާއި، ވިލިމާލެއިން ރާއްޖޭގެ އެހެނިހެން ރަށްރަށަށް ދަތުރުކުރާ ފަރާތްތައް ކަރަންޓީނު ކުރުން.
- 2021 ޖަނަވަރީ 29 ވަނަ ދުވަހުން ފެށިގެން، ފަތުރުވެރިން ފިޔަވައި، ރާއްޖެއިންބޭރުން އަންނަ ފަރާތްތައް 10 ދުވަހުގެ މުއްދަތަށް ކަރަންޓީނު ކުރުން ހިމެނެއެވެ.
ފިޔަވަޅުތައް އަޅާފައިވާއިރު، މިދިޔަ ދުވަސްތަކުގައި މާލެ އިން ކޮވިޑް-19 ޖެހުނު މީހުންގެ އަދަދުވަނީ އިންތިހާއަށް އިތުރުވެފައެވެ. އެގޮތުން ޖެނުއަރީ މަހުގެ ފުރަތަމަ 24 ދުވަހު އެކަނި ވެސް ރާއްޖެއިން ވަނީ 1200 އަށް ވުރެ ގިނަ މީހުން ފައްސިވެފައެވެ. އަދި ތިން މީހަކު ވަނީ ނިޔާވެފައެވެ.
