އަންނަ މަހު 3 ގައި ކޮވިޑް ވެކްސިން ދޭން ފަށަނީ
އަންނަ މަހު 3 ގައި ކޮވިޑް-19 ވެކްސިން ރާއްޖޭގައި ޖަހަން ފަށަން ނިންމައިފިއެވެ.
އިންޑިއާގެ ސެރަމް އިންސްޓިޓުޓުން އުފައްދާފައިވާ އަސްޓްރާޒެނެކާ ވެކްސިން ރާއްޖޭގައި ބޭނުން ކުރުމުގެ ހުއްދަ ރާއްޖޭގެ ފުޑް އެންޑް ޑްރަގް އޮތޯރިޓީން މި މަހުގެ 26 ގައި ވަނީ ދީފައެވެ.
މައުލޫމާތު ލިބޭ ގޮތުގައި އަންނަ ފެބްރުއަރީ މަހުގެ 3 ވަނަ ދުވަހު ވެކްސިން ޖަހަން ފަށަން ވަނީ ސަރުކާރުން ނިންމާފައެވެ.
ވެކްސިން ބޭނުން ކުރުމަށް ދީފައި ވަނީ "ރިސްޓްރިކްޓެޑް ޔޫސް އިން އިމަޖެންސީ ސިޗުއޭޝަން" ނުވަތަ ކުއްލި ހާލަތުގައި ބޭނުން ކުރުމުގެ ހުއްދަކަމަށް ވެސް ހެލްތް މިނިސްޓްރީން ބުނެއެވެ.
ދިވެހިރާއްޖޭގައި މި ވެކްސިން ބޭނުން ކުރުމުގެ ހުއްދަ އެ އޮތޯރިޓީން ދީފައި ވަނީ ، މި ކަމުގައި ބަލަންޖެހޭ ޓެކްނިކަލް ކަންކަން ފުރިހަމައަށް ބަލައި ދިރާސާ ކުރުމަށް ފަހު، މި އޮތޯރިޓީއަށް ފަންނީ ލަފާދޭ ޓެކްނިކަލް ބޯރޑު ކަމުގައިވާ ނޭޝަނަލް ފާރމަސޫޓިކަލް ބޯޑުގެ ލަފަޔާ މަޝްވަރާއާ އެކުގައި ކަމަށް ވެސް އެ މިނިސްޓްރީން ނެރުނު ބަޔާނުގައި ވަނީ ބުނެފައެވެ.
