ކޮވިޑުން އަރައިގަތުމަށް ރައީސް ކުރައްވާ މަސައްކަތް ރައްޔިތުން ވަނީ ބަލައިގެންފައި: ޝާހިދު
ކޮވިޑް-19އިން އަރައިގަތުމަށް ރައިސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ބެއްލެވުމުގެ ދަށުން ސަރުކާރުން ކުރައްވާ މަސައްކަތްތައް ރައްޔިތުން ބަލައިގަނެފައި ވާކަމަށް ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
ފޮރިން މިނިސްޓަރ މިހެން ވިދާޅުވީ ވ. ކެޔޮދޫގައި ފުލުހުންގެ ޚިދުމަތް ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. ޝާހިދު ވިދާޅުވީ ސަރުކާރުން ނެރެން ޖެހޭ އިރުޝާދުތައް ނެރުއްވުމުގައި އެމަނިކުފާނު ސާބިތުވެ ހުންނެވި ކަމަށެވެ. އަދި ކޯވިޑުން އަރައިގަތުމަށް ރައީސް ކުރައްވާ މަސައްކަތްޕުޅު ރައްޔިތުން ބަލައިގެންފައިވާ ކަމަށެވެ.
މިނިސްޓަރ ޝާހިދު ވިދާޅުވީ، ރާއްޖޭގެ އިޤްތިޞާދު ހުއްޓި، އެންމެ ދަތިވި ދުވަސްވަރު ވެސް އެއްވެސް ރައްޔިތަކަށް ބަނޑުހައި ހޫނުކަމުގެ ހިތްދަތިކަން ތަހައްމަލު ކުރަން ނުޖެހި، އަސާސީ ބޭސްފަރުވާއަށް ނުޖެހި، ބޭނުންވި ހުރިހާ ކަމެއް ރައީސް އިބްރާހިމް މުހައްމަދު ސާލިހްގެ ސަރުކާރުން ކޮށްދެއްވާފައިވާ ކަމަށެވެ.
އަދި ރައީސް ކުރައްވާ މަސައްކަތްޕުޅު ރައްޔިތުން ބަލައިގަތީ ރައީސް އެކަމުގައި އިސްވެ ހުންނަތަން، ސާބިތުވެ ހުންނެވިތަން، ފެނިގެން ދިޔުމުން ކަމަށެވެ. މީގެ އިތުރުން މިނިސްޓަރ ވިދާޅުވީ، ފާއިތުވި އަހަރަކީ ރާއްޖެއަށް ތަދު އަދި ހިތްދަތިކަން އިންތިހާއަށް ތަހައްމަލުކުރި އަހަރެއް ކަމަށެވެ.
އެގޮތުން ރާއްޖޭގެ ހުރިހާ ރަށެއްގައި ރައްޔިތުން ބަންދުވެ ތިބެން ޖެހުނު ކަމަށާއި، ނަމަވެސް މިހާރު އެހާލަތުން އަރައިގަނެވި ރާއްޖޭގެ އިޤްތިޞާދު ރަނގަޅުވަމުން ދާއިރު އެކަމުގެ ހެޔޮ ނަތީޖާ ފެންނަމުން ދާކަމަށް ވެސް ޝާހިދު ވިދާޅުވިއެވެ.
