ރާއްޖޭގައި މާދަމާ ކޮވިޑް-19 ވެކްސިން ދޭން ފަށަނީ
މާދަމާ ރާއްޖޭގައި ކޮވިޑް-19 ވެކްސިން ދޭން ފަށަން ނިންމައިފިއެވެ.
ހެލްތު މިނިސްޓްރީގެ ސްޓޭޓް މިނިސްޓަރު ޝާހް މާހިރު އާ ހަވާލާދީ އޮންލައިން ނޫހެއް ކަމަށްވާ "މިހާރު" ގައި ރިޕޯޓުކޮށްފައިވާ ގޮތުގައި މާދަމާ ވެކްސިން ޖަހަން ފަށަން ނިންމާފައިވާއިރު، މާލޭގެ އިތުރުން ރާއްޖޭގެ ދެ ސަރަހައްދެއްގައި ވެކްސިން ދޭނެއެވެ.
މާލޭގެ އިތުރުން ދެން ވެކްސިން ޖަހާނީ އައްޑޫ ސިޓީއާއި ކުޅުދުއްފުށި ސިޓީގައެވެ. މި ދެ އަތޮޅަށް މިހާރު ވެކްސިން ވަނީ ފޮނުވާފައެވެ.
އިންޑިއާގެ ސެރަމް އިންސްޓިޓިއުޓުން އުފެއްދި "ކޮވިޝީލްޑް" ވެކްސިންގެ އެއް ލައްކަ ޑޯޒް އެޤައުމުން ވަނީ ރާއްޖެއަށް ހިލޭ ހަދިޔާ ކޮށްފައެވެ.
އިންޑިއާއިން ރާއްޖެއަށް ހަދިޔާ އަސްޓްރާޒެނެކާ ވެކްސިން ރާއްޖޭގައި ބޭނުން ކުރުމުގެ ހުއްދަ ރާއްޖޭގެ ފުޑް އެންޑް ޑްރަގް އޮތޯރިޓީން ދީފައިވަނީ މި މަހުގެ 26 ވަނަ ދުވަހުއެވެ. މި ވެކްސިން އަށް ދީފައިވަނީ "ރިސްޓްރިކްޓެޑް ޔޫސް އިން އިމަޖެންސީ ސިޗުއޭޝަން" ނުވަތަ ކުއްލި ހާލަތުގައި ބޭނުން ކުރުމުގެ ހުއްދައެވެ.
