އިންތިޚާބު އެމްޑީޕީއަށް ކާމިޔާބު ނުވާނެ ސަބަބެއް ހިސާބު ޖެހިއިރު ނެތް : ރައީސް ނަޝީދު

ވެރިކަމުގައި ގާނޫނު އިސްލާހުކޮށް ފުރިހަމަ ބާރާއި މިނިވަންކަންދީ އެމްޑީޕީން ކައުންސިލް އިންތިޚާބަށް ނުކުތީ އިދިކޮޅު ތިން ބަލިކުރަން ކަމަށް ކުރީގެ ރައީސް އަދި މިހާރު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.

Ads by Sosun Fihaara

މިއަހަރުގެ އޭޕްރިލް މަހުގެ 10 ވަނަ ދުވަހު އޮންނަ ކައުންސިލު އިންތިހާބަށް އެމްޑީޕީގެ ކެމްޕޭނު ފެށުމާ ގުޅޭގޮތުން ބޭއްވި ނޫސް ކޮންފަރެންސެއްގައި ވާހަކަ ދައްކަވަމުން ރައީސް ނަޝީދު ވިދާޅުވީ މާލެ ހިމެނޭ ގޮތުން ރާއްޖޭގެ ކައުންސިލްތަކުގެ ބޮޑު އަޣުލަބިއްޔަތެއް އެމްޑީޕީން ކާމިޔާބުކުރާނެ ކަމަށާއި މައި ސަރުކާރަށް ބަރޯސާނުވެ ރަށާއި އަތޮޅުތައް ތަރައްގީކުރަން ގާނޫނަށް އިސްލާހު ގެނެސް ދީފައިވާ ބާރުވެރިކަމާއި މިހާތަނަށް ރަށްރަށުގައި ސަރުކާރުން ހިންގި މަޝްރޫއުތަކަށް ބަލާއިރު އިންތިޚާބު އެމްޑީޕީއަށް ކާމިޔާބު ނުވާނެ ސަބަބެއް ހިސާބު ޖެއްސެވިއިރު ނެތް ކަމަށެވެ.

"މިއީ، ރަށްވެހި ކަމުގެ އާ ފަތިހެއް، މިއީ ދިވެހި ރައްޔިތުންގެ ޑިމޮކްރެޓިކް ޕާޓީ، އަޅުގަނޑުމެންގެ ވާދަވެރިން ތިން ބަލިކުރަން ނުކުންނަ ފަހަރު. އިރާދަކުރެއްވިއްޔާ ބޮޑު ބައްޔަކުން އަޅުގަނޑުމެންގެ ވާދަވެރިން ބަލިކުރާނަން،" ރައީސް ނަޝީދު ވިދާޅުވި އެވެ.

ރައީސް ނަޝީދުގެ ވާހަަކަފުޅުގައި ތިން ބަލި ކުރާނެ ކަމަށް އިޝާރާތް ކުރެއްވީ ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމް ވާދަކުރެއްވި ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބުން އިދިކޮޅަށް ލިބުނު ނާކާމިޔާބަށެވެ.