ޙަލާލު ޙަރާމް ކަނޑައެޅުމަކީ މަޖިލިސް މެމްބަރަކަށް ލިބިގެންވާ ބާރެއް ނޫން: ޑރ އިޔާޒު
ޙަލާލު ޙަރާމް ކަނޑައެޅުމަކީ މަޖިލިސް މެމްބަރަކަށް ލިބިގެންވާ ބާރެއް ނޫން ކަމަށް ދީނީ އިލްމުވެރިޔާ ޑރ. މުހައްމަދު އިޔާޒު ވިދާޅުވެއްޖެއެވެ.
ޑރ.އިޔާޒް މިހެން ވިދާޅުވެފައި ވަނީ މިއަދު ކުރެއްވި ޓްވީޓެއްގައެވެ. އިޔާޒް ވިދާޅުވީ ޙަލާލު ޙަރާމް ކަނޑައެޅުމަކީ މަޖިލިސް މެމްބަރަކަށް ވެސް ލިބިގެންވާ ބާރެއް ނޫން ކަމަށާއި އެކަން ކަނޑައަޅުއްވާނީ ﷲ އާއި ރަސޫލާ ﷺ ކަމަށެވެ.
އިޔާޒު މިހެން ވިދާޅުވެފައި ވަނީ މާލޭގައި ޒުވާނުން ހިތްފަސޭހަ ކޮށްލައި މުނިއަވަސް ފިލުވައި ހާސްކަމެއް ނެތި މަޖާކޮށް މިއުޒިކު ކުޅެ މިއުޒިކު އަޑުއަހައި ނަށާލާނެ މަރުކަޒެއް ޤާއިމުކުރުމަށް ގޮވައިލާ ރައްޔިތުންގެ މަޖިލިހުގެ ހެންވޭރު ހުޅަނގު ދާއިރާ މެންބަރު ޙަސަން ލަޠީފު ހުށަހެޅުއްވި ޤަރާރަށް ބަހުސް ކުރައްވަމުން މިއުޒިކާއި، ލަވައާއި، ވާހަކައާއި ތަމްސީލާ ނުލައި ޤައުމެއްގެ ސަޤާފަތެއް ތަރިކައެއް، އަދި ޤައުމެއްގައި ރޫޙެއް ވެސް ނޯންނާނެ ކަމަށް ރައްޔިތުންގެ މަޖިލިހުގެ ނައިބުރައީސް އަދި ގަލޮޅު އުތުރު ދާއިރާ މެންބަރު އީވާ ޢަބްދުﷲ ވިދާޅުވުމާއި ގުޅިގެންނެވެ.
އީވާ ވިދާޅުވީ މިއުޒިކަކީ ދުނިޔެ އުޖާލާ ކުރުމާއެކު ދުނިޔެ އިންޤިލާބުކުރާ އެއްޗެއް ކަމަށެވެ. އަދި އިސްލާމީ ތާރީހުގައި އުމަވީ ޚިލާފަތާއި ޢައްބާސީ ޚިލާފަތަކީ އިސްލާމީ މިއުޒިކުގެ ރަންޒަމާން ކަމަށް ވިދާޅުވެ އީވާ ވިދާޅުވީ އެ ދުވަސްވަރުގެ މިއުޒިކުން އިސްލާމްދީނާއި އިސްލާމީ ދައުލަތުގެ އަޑު ދުނިޔޭގެ ގިނަ ބައެއްގެ ކަންފަތްތަކަށް ފޯރި ކަމަށެވެ.
