ރިޝީ ކަޕޫރުގެ ކޮއްކޮ ރާޖީވް ކަޕޫރު މަރުވެއްޖެ
1980 އަދި 1990ގެ އަހަރުތަކުގައި ބޮލީވުޑްގައި ގިނަ ބައެއްގެ މަގުބޫލުކަން ހޯދި ފިލްމީ ތަރި ރާޖީވް ކަޕޫރު މަރުވެއްޖެއެވެ.
ރާޖީވް ކަޕޫރަކީ މިދިޔަ އަހަރު ތެރޭގައި މަރުވި ބޮލީވުޑްގެ އެކްޓަރު ރިޝީ ކަޕޫރުގެ ކޮއްކޮއެވެ. އެގޮތުން އޭނާ އަކީ ކަޕޫރު ފެމިލީގެ މުހިންމު މެންބަރެކެވެ.
މިއަދުގެ ވަގުތެއްގައި އޭނާ މި ދުނިޔެ ދޫކޮށްފައިވާއިރު، އޭނާ މަރުވީ ހާޓް އެޓޭކެއް ޖެހިގެން ކަމަށް ބޭރުގެ މީޑިއާތަކުން ރިޕޯޓް ކުރެއެވެ. އޭނާ މަރުވި އިރު އޭނާގެ އުމުރަކީ 58 އަހަރެވެ.
ހާޓް އެޓޭކެއް ޖެހިގެން އޭނާ މިއަދުގެ ވަގުތެއްގައި ހޮސްޕިޓަލަށް ގެންދެވުނު ކަމަށާއި ހޮސްޕިޓަލަށް ގެންދެވުނުތާ މާ ގިނައިރުތަކެއް ނުވަނީސް އޭނާ މަރުވެފައިވާ ކަމަށް އޭނާގެ ބޭބެ އަދި ބޮލީވުޑްގެ މަޝްހޫރު އެކްޓަރު ރަންދީރު ކަޕޫރު ބުންޏެވެ. އަދި ޑޮކްޓަރުން ރާޖީވް ސަލާމަތް ކުރުމަށް ކުރެވުނުހާ މަސައްކަތެއް ކުރި ކަމަށާއި ނަމަވެސް އެކަން ކާމިޔާބު ނުވީ ކަމަށް ވެސް ވެސް ރަންދީރު ބުނެފައިވެއެވެ.
ރާޖީވްގެ މަރާއެކު ބޮލީވުޑް އާއިލާގެ ގިނަ ފަންނާނުންތަކެއް ވަނީ މީސްމީޑިއާގައި ހިތާމަ ފާޅު ކޮށްފައެވެ. އަދި އޭނާގެ ގިނަ ސަޕޯޓަރުން ވެސް އެ ހިތާމައިގައި ބައިވެރިވެފައި ވެއެވެ.
ރާޖީވް ކަޕޫރުގެ ފާހަގަކޮށްލެވޭ ފިލްމުތަކުގެ ތެރޭގައި ރާމް ތެރީ ގަންގާ މޭލީ (1985) އަދި އެކް ޖާންހޭ ހަމް (1983) ފާހަގަ ކޮށްލެވެއެވެ. މީގެ އިތުރުން ރާޖީވް ޑައިރެކްޓް ކޮށްފައިވާ ފިލްމު ތަކުގެ ތެރޭގައި ޕްރޭމް ގްރާންތު ފާހަގަ ކޮށްލެވެއެވެ.
