މިސްބާހާއި ނަޒީރު ތާލިބާނުންނާ ގުޅުން އޮތްތޯ މަޖިލީހުން ބަލަނީ
މަރު ކޮމިޝަންގެ މެމްބަރު މިސްބާހު އައްބާސް އާއި ހޯމް މިނިސްޓްރީގެ ސްޓޭޓް މިނިސްޓަރު އަލީ ނަޒީރު، ތާލިބާންއާއެކު ތަމްރީނެއް ހަދާފައިވޭތޯ ބެލުމަށް މަޖިލީހުން ނިންމައިފި އެވެ.
މިއަދު އޮތް ރައްޔިތުންގެ މަޖިލީހުގައި ރައީސް މުހައްމަދު ނަޝީދު ވިދާޅުވީ މިސްބާހާއި ނަޒީރު ތާލިބާންއާއި އެކު ތަމްރީނަކަށް ދިޔަތޯ އާއި އެ އެދެބޭފުޅުންގެ އެފަދަ ފިކުރުތަކެއް ހުރިތޯ ކަމާ ގުޅޭ އިދާރާތަކުން ބައްލަވާނެ ކަމަށެވެ.
ނަޝީދު މިހެން ވިދާޅުވެފައި ވަނީ މާލޭގައި މަޖާކޮށްލެވޭ މަރުކަޒުތައް ގާއިމު ކުރުމަށް ގޮވާލާ، ރައްޔިތުން މަޖިލީހުގެ ހެންވޭރު ހުޅަނގު ދާއިރާގެ މެންބަރު، ހަސަަން ލަތީފު ހުށަހަޅުއްވައިފައިވާ ޤަރާރަށް ބަހުސް ކުރައްވަމުން ރައްޔިތުންގެ މަޖިލީހުގެ ނައިފަރު ދާއިރާ މެމްބަރު އަހްމަދު ޝިޔާމް، މިސްބާހު އާއި ނަޒީރު އެފަދަ ތަމްރީނެއް ހެދިތޯ ބަލަން ޖެހޭކަމަށް ވިދާޅުވުމުންނެވެ.
ޝިޔާމް ވިދާޅުވީ ޓެރަރިސްޓް ޖަމާއަތްތަކާ ގުޅުން އޮންނަ ކަމަށް ތުހުމަތު ކުރެވެނީ ޒުވާނުންނަށް ކަމަށާއި މިސްބާހު އާއި ނަޒީރު އެފަދަ ތަމްރީނެއް ހެދިތޯ ބަލަން ޖެހޭ ކަމަށެވެ.
"މަރުކޮމިޝަންގެ މެމްބަރު މިސްބާހު އައްބާސް، އަޅުގަނޑުމެން އެބަ ޖެހޭ ހިސްޓްރީ ބަލާލަން. އަޅުގަނޑުމެން އެބަ ޖެހޭ މިސްބާހު އައްބާސް ތާލިބާންއާއެކު ޓްރޭނިން ހެދިތޯ ބަލާލަން،" ޝިޔާމް ވިދާޅުވިއެވެ.
Ads by STO
