ޕީޕީއެމްގެ ވެރިކަމެއްގައި އެންމެ ފުރަތަމަ ފްލެޓް ދޭނީ މިއަދު ފްލެޓް ނިގުޅައިގަތް މީހުންނަށް: މުޢިއްޒު
އިދިކޮޅު ޕީޕީއެމް ގެ ދެން އަންނަ ވެރިކަމެއްގައި އެންމެ ފުރަތަމަ ފްލެޓު ދޭނީ މިސަރުކާރުން ފްލެޓު ނިގުޅައިގަތް މީހުންނަށް ކަމަށް ކުރީގެ ހައުސިންގ މިނިސްޓަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އިދިކޮޅު ޕްރޮގްރެސިވް ކޯލިޝަންގެ ފަރާތުން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. މުޢިއްޒު ވިދާޅުވީ، ޕީޕީއެމް ވެރިކަމެއްގައި އެންމެ ފުރަތަމަ ފްލެޓް ދޭނީ މިއަދު ފްލެޓް ނިގުޅައިގަތް މީހުންނަށް ކަމަށާއި އޭގެ އިތުރުން ފްލެޓަށް އެދުނު ހުރިހާ މީހުންނަށް ވެސް ބޯހިޔާވަހިކަން ޔަގީން ކޮށްދެއްވާނެ ކަމަށެވެ.
ޑރ. މުޢިއްޒު ވިދާޅުވީ މިއަދު ކުރިމަތިވެފައި މިވާ ހާލަތަކީ އެއްގޮތަކަށް ވެސް އިންސާފުވެރި ކަމާއެކީގައި މިސަރުކާރުން ކުރި ކަމެއް ނޫން ކަމަށެވެ.
"އެތައްހާސް ރައްޔިތުންނަކަށް މިސަރުކާރުން މިވަނީ އަނިޔާވެރިވެފަ. ގެދޮރުވެރިކަމުގެ މިމައްސަލައިގައި ރައީސް ޔާމީންގެ ސަރުކާރުގައި ހުޅުމާލޭ ދެވަނަ ފިޔަވަހި، ގެދޮރުވެރި ކަމަށްޓަކައި ހިއްކަވާ، އެތަން ތަރައްޤީ ކުރައްވަވާ އެތަނުގައި އެތައްހާސް ހައުސިންގ ޔުނިޓުތަކެއް އެޅުމުގެ މަސައްކަތް ނިމުމަކާ ހަމައަށް ގެންދެވި." ޑރ. މުޢިއްޒު ވިދާޅުވިއެވެ.
ޑރ. މުޢިއްޒު ވިދާޅުވީ ޕީޕީއެމްގެ ވެރިކަމެއްގައި ދޭ ޔަގީން ކަމަކީ، އެންމެ ފުރަތަމަ ބިނާ ކުރެވޭ ގެދޮރުވެރިކަމުގެ މަޝްރޫޢުއިން އެންމެ ފުރަތަމަ ފްލެޓު ލިބިގެން ދާނީ މިއަދު ރައީސް އިބްރާހިމް މުޙައްމަދު ޞާލިޙު ގެ ވެރިކަމުގައި ފްލެޓުތައް ނިގުޅައިގަތް މީހުންނަށް ކަމަށެވެ.