އައްޑުއަށް ބަލި ފެތުރުނީ ކިހިނެއްކަން ބުނަން ނޭނގިދާނެ: ޑރ.ލަތީފް
އައްޑޫ ސިޓީ އަށް ކޮވިޑް-19 ގެ ބަލިމަޑުކަން ފެތުރުނީ ކީއްވެގެންކަން ބުނަން ނޭނގިދާނެ ކަމަށް ޑރ. އަލީ ލަތީފު ވިދާޅުވެއްޖެ އެވެ.
ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަމުން ޑރ. އަލީ ލަތީފު ވިދާޅުވީ ގިނަ ފަހަރަށް ސީދާ އިންޑެކްސް ކޭސް (ފުރަތަމަ ކޭސް) ފެތުރު ގޮތް ނޭނގިދާނެ ކަމަށާއި މިހާތަނަށް ބެލި ބެލުމުން އައްޑޫ އަށް ބަލި ފެތުރުނީ ގަމުގައި ބޭއްވި ޓްރޭނިންއާ ގުޅިގެން ކަމަށް ޔަގީންކަމާއެކު ދަންނަވަން ދަތި ކަމަށެވެ.
އައްޑޫ ސިޓީގައި އުފެދި ބޮޑުވަމުންދާ ކޮވިޑް-19ގެ ކްލަސްޓާއާ ގުޅިގެން މިހާތަނަށް 172 ގެ ކަރަންޓީން ކޮށްފައިވާ ކަމަށް އައްޑޫ އިމާޖެންސީ އޮޕަރޭޝަން ސެންޓަރުން ބުނެފި އެވެ. އައްޑޫ އިމާޖެންސީ އޮޕަރޭޝަން ސެންޓަރުން މައުލޫމާތު ދީފައިވާ ގޮތުގައި އައްޑޫގައި ކޮވިޑް ދެ ކްލަސްޓާއެއް ހިމެނެއެވެ.
އައްޑޫ ސިޓީ ހިތަދޫން ފައްސިވެފައި ވަނީ 17 މީހެކެވެ. މީދޫން ހަތަރު މީހަކު ފައްސި ވެފައި ވާއިރު ފޭދޫން ހަތް މީހެއްގެ އަދި ހުޅުދޫން 25 މީހުން މިހާތަނަށް ފައްސި ވެފައިވެއެވެ. އައްޑޫ ކްލަސްޓާއިން 53 އެކްޓިވް ކޭސް މިހާރު ވަނީ ފާހަގަ ކުރެވިފައެވެ.
މިހާރު ރާއްޖެއިން މިބައްޔަށް ޖުމްލަ 17،507 މީހުން ފައްސި ވެފައިވެއެވެ.
ރާއްޖެއިން މިހާރު ކޮވިޑް ބަލިން ފަސޭހަ ވެފައިވަނީ ޖުމްލަ 15،142 މީހުންނެވެ. އަދި މިބަލީގައި ރާއްޖެއިން ނިޔާވި މީހުންގެ ޖުމްލަ އަދަދު މިހާރު 56 އެވެ.
މީދުއިންބަޔަކު ފައްސިވި ކަމެއް އަދި އެގިފަކައެއް ނެތް ޑޮކޮޓަރައް އޮޅުމެއް އަރައިގެން ހެން ހީވަނީ