މިކަންކަން ކޮންމެ މީހަކަށް ވެސް ދަސްވަނީ ވަގުތު ފާއިތުވާ ފަހުން
ދިރިއުޅުމަކީ އަޑިގުޑަން ބޮޑު މަގެކެވެ. އެ މަގުން ދަތުރު ކުރާއިރު ހިތް ނޭދޭ އެތައް ކަމަކާ ދިމާވެއެވެ. އެތައް ތަޖުރިބާތަކެއް ކުރަން ޖެހެއެވެ. ދިމާވާ ކަންކަމުގައި ތަޖުރިބާގެ ބޭނުން ހިފުމުގެ ނިޔަތް އޮތަސް ގިނަ ކަންކަމުގައި އަހަރެމެންނަށް ރަނގަޅު ނިންމުންތަކެއް ނުނިންމެއެވެ. ކަމެއް ހިނގުމުން ، މި ކުރެވުނީ ރަނގަޅަށް ނޫންކަން ހިތަށް އަރާ ކިތަންމެ ފަހަރަށް އަހަރެމެންނާ ބައްދަލު ވެފައި ހުންނާނެއެވެ.
މި ފާހަގަ ކޮށްލާ ކަމަކީ ވެސް އެފަދަ ކަންކަމެވެ. ރަނގަޅަށް ވިސްނަވާލައްވާށެވެ. ގިނަ މީހުން ނުވަތަ އެންމެންގެ ޙަޔާތުގައި ވެސް މިކަންކަން ނުވަތަ މީގެ ކަމެއް ދިމާވެފައި ހުންނާނެއެވެ. ނަމަވެސް ހިތާމަޔަކީ މިކަންކަން ވިސްނެނީ ވަގުތު ފާއިތުވާ ފަހުން ކަމަށް ވުމެވެ.
1- ހުރިހާ ކަމަކީ ވެސް ވަގުތީ ކަންކަން
ދިރިއުޅުމުގައި ދިމާވާ ބައެއް ދަތި އުނދަގޫ ހާލަތްތަކަކީ ބަރުދާސްތު ކުރަން ފަސޭހަ ހާލަތްތަކެއް ނޫނެވެ. އެ ފަދަ ހާލަތްތަކުގައި މާޔޫސްވެ ގޯސް ނިންމުންތައް ނިންމޭ ތަން ވެސް ވަރަށް ގިނަ ފަހަރު ފެނެއެވެ. ނަމަވެސް ދުވަސްކޮޅެއް ފަހުން ހާލަތު ބަދަލުވެ ، މާޒީއަށް އެނބުރިލާ ބަލާލުމުން ޔަގީން ވެގެން ދަނީ ކޮންމެ ކަމެއް ވެސް ވަގުތާއެކު ނިމިގެންދާ ކަމެވެ. އުނދަގޫވީ ހާލަތު ބަދަލު ވެއްޖެކަމެވެ.
2- ދިރިއުޅުން އިންސާފުވެރިއެއް ނޫން
ހަޔާތުގެ ހަމަ ކޮންމެ ކަމަކީ ވެސް އިމްތިހާންތަކެވެ. އާއިލީ މާހައުލާއި އޮފީސް މާހައުލުގައި ވެސް ތިމާގެ ހިތް ނޭދޭ ކިތަންމެ ކަމެއް ހިނގާކަމީ ހަގީގަތެވެ. ތިމާ ކިތަންމެ ބުރަކޮށް މަސައްކަތް ކުރި ނަމަވެސް މަގާމުގެ ކުރިއެރުމާއި އެހެން ކަންކަން ހާސިލުވުމުގައި ކާމިޔާބު ނުވާ ފަހަރު އަންނާނެކަން ދަންނަން ވާނެއެވެ. ދިރިއުޅުމުގެ ހުރިހާ ކަމެއްގައި އިންސާފު ލިބުމަކީ ވާނޭ ކަމެއް ނޫނެވެ.
3- އެހެން ހުރިހާ ކަމަކަށްވުރެ އާއިލާ މުހިންމު
މިއީ ވަރަށް ގިނަ މީހުންނަށް އިބުރަތެކެވެ. މާފަހުން ދަސްވާ ކަމެކެވެ. އާއިލާގެ މައްޗަށް ގާތް އެކުވެރީންނާއި ރަހުމަތްތެރީން އިސްކުރާއިރު ގިނަ ފަހަރު ކަމެއް ދިމާވާއިރު އެމީހުންނެއް ނުތިބެއެވެ. ބަލިވެ ނުވަތަ ބޮޑު ކަމެއް ދިމާވާ ޙާލަތުގައި ވެސް އެންމެ އަވަހަށް އެކަމަށް ދުއްވައި ގަންނަނީ އާއިލީ މެމްބަރުންނެވެ.
4- އެހެން މީހުން ތިމާއާ މެދު އަމަލު ކުރާނީ ތިމާ އެމީހުންނާ އަމަލު ކުރާ ފަދައިން
އަހަރެމެންނާ މެދު އެހެން މީހުން ހެޔޮކޮށް ހިތުމަކީ ކޮންމެ މީހަކު ވެސް ބޭނުންވާނޭ ކަމެކެވެ. އެހެން މީހުންގެ ލޯތްބާއި އިހްތިރާމަކީ ހަމަ ކޮންމެ މީހަކު ލިބުން އެދޭނެ ކަމެކެވެ. ނަމަވެސް ހަނދާން ނެތޭ ކަމަކީ އެ ފަދައިން އެދޭއިރު ވެސް އެހެން މީހުންނާމެދު ހެޔޮކޮށް ކަންތައް ނުކުރެވޭ ކަމެވެ. އެހެން މީހުންނަށް އިހްތިރާމް ނުކުރެވޭ ކަމެވެ. މީހެއްގެ ފަރާތުން ނުރުހުން ލިބޭއިރު ގިނަ ފަހަރަށް އެމީހަކާ މެދު ކަންތައް ކުރެވިފައި އޮންނަނީ ރަނގަޅަކަށް ނޫނެވެ.
5- ރުޅި މަޑު ކުރަން ވާނެ ، އެއީ ހަލާކެއް
މިއީ ވަރަށް ގިނަ މީހުންނަށް ތަޖުރިބާ ކުރެވިފައި އޮންނާނޭ ކަމެކެވެ. ރުޅި އައިސް އަތުން ފައިން ގޯސް ހެދި އެތައް ގެއްލުންތަކެއް ވާ ފަހަރުތައް މަދެއް ނޫނެވެ. ޚާއްޞަކޮށް ދެމަފިރިންގެ ދެމެދުގައި ޖެހޭ މައްސަލަތަކުގައި ރުޅި ކޮންޓްރޯލް ނުވެ އާއިލާތައް ރޫޅިދަނީ މަދެއް ކޮށެއް ނޫނެވެ. ނަމަވެސް ވިސްނޭއިރު އޮންނަނީ ވަގުތު ފާއިތުވެފައެވެ.
6- އުފާވެރިކަމަކީ އިޚްތިޔާރެއް، އެއީ ބުރަ މަސައްކަތުގެ ފޮނިކަން
އުފާވެރި ކަމާއި ހިތްހަމަ ޖެހުމަކީ ޙަޔާތެއްގެ މޭވާއެވެ. ފޮނި މީރު ކަމެވެ. ނަމަވެސް ދަންނަންވި ކަމަކީ އުފާވެރި ކަމަކީ ހުރިހާ ދިރިއުޅުމެއްގައި ހިމެނޭ ކަމެއް ނޫން ކަމެވެ. އެއީ އެތައް ކަމެއްގެ ތެރެއިން ތިމާ އިޚްތިޔާރު ކުރަން ޖެހޭ ކަމެކެވެ. އެކަން އިޚްތިޔާރު ކުރެވޭނީ ބުރަ މަސައްކަތުންނެވެ. އެއް ފަހަރު ، ދެ ފަހަރު ނުވަތަ ތިން ފަހަރު ފެއިލް ވި ނަމަވެސް ހަތަރު ވަނަ ފަހަރު ވެސް މަސައްކަތް ކޮށްގެންނެވެ.
7- ހަޔާތަކީ މަދު ދުވަސްކޮޅެއް
އަހަރެމެންގެ އެންމެ އުނި އެއް ސިފައަކީ ކަންކަން ފަސް ކުރަމުން ގެންދިޔުމެވެ. ވަގުތުތައް ބޭކާރުކޮށް އަބަދު ވެސް މާދަމާގެ ޝެޑިއުލް ބަރާކުރަމުން ގެންދިޔުމެވެ. ޚާއްޞަކޮށް ހަޔާތުގައި ޙާޞިލް ކުރަން ބޭނުންވާ ބޮޑެތި ކަންކަން ކާމިޔާބު ކުރުމަށް އިސްތިރާޖީ ރޭވުންތައް ގެންގުޅެން ޖެހެއެވެ. ނޫނީ ބޭނުންވާ ލަނޑުދަނޑި ހާޞިލް ނުވެ އެކަމާ ވިސްނާލާއިރު އެކަންކަން ކާމިޔާބު ކުރެވެން އޮތް އެންމެ ތަނަވަސް އުމުރު އޮންނާނީ ފާއިތުވެފައެވެ. އެހެނީ ހަޔާތަކީ މަދު ދުވަސްކޮޅެކެވެ.
8- އެންމެ ބޮޑު ރިސްކަކީ ރިސްކު ނުނެގުން
އެއްވެސް ކަމަކީ ތިމާއަށް ޔަގީންވެ ކަށަވަރުވާ ކަމެއް ނޫނެވެ. ކޮންމެ ކަމެއްގައި ވެސް ކާމިޔާބު ވުމާއި ނުވުން އޮންނާނެ ކަމީ ދުނިޔޭގެ ގާނޫނެވެ ފިތުރަތުގެ އުސޫލެވެ. ނަމަވެސް ކާމިޔާބު ނުވެދާނެ ކަމުގެ ބިރަށްޓަކައި ކުރަން ބޭނުންވާ ކަންކަން ނުކޮށް ހުރުމަކީ ބުއްދިވެރި ގޮތެއް ނޫނެވެ، އެހެނީ ރިސްކު ނުނެގުމަށް ވުރެ ބޮޑު ރިސްކެއް ދިރިއުޅުމުގައި ނޯންނާނެއެވެ.
6 ވަނަ ޕޮއިންޓުގައި ވާ ލިޔުން ކިޔައިލުމަށްފަހު ހިތަށް އަރަނީ އުފާ ފާޅުކުރަންވާނީ އެފަދަ އުފަލެއް ލިބިފައި ނެތް މީހާޔާމެދު ވިސްނާލުމަށްފަހުގައި (ޖެއްސުމުގެ ގޮތުގައެއް ނޫން ފިލާވަޅެއްގެ ގޮތުގައި)