އިތުރަށް ފަސް އަހަރަށް ރައްޔިތުންނަށް ވޭންދިނުމަކީ އޯގާތެރި ސިފައެއްނޫން :ޑރ.ޖަމީލް

ރައީސް އިބްރާހީމް މުޙައްމަދު ޞާލިޙްގެ ސަރުކާރަކީ ސްޕީޑް ދަށް، ސްލޯ ސަރުކާރެއް ކަމަށާއި އިތުރަށް ފަސް އަހަރަށް ރައްޔިތުންނަށް ވޭން ދިނުމަކީ އޯގާތެރި ސިފައެއް ނޫން ކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.

Ads by Hajj Corporation

ޑރ.ޖަމީލް މިހެން ވިދާޅުވެފައި ވަނީ، ރާއްޖެއަށް ފުރިހަމަ ތަރައްގީ ގެންނަން ރައީސްކަމުގެ ދެ ދައުރު ފުރިހަމަ ކުރަން ރައީސް ޞާލިޙަށް ފުރުސަތު ދޭންޖެހޭ ކަމަށް ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވުމުން އެކަމަށް ރައްދު ދެއްވަމުންނެވެ.

މިގޮތުން ޖަމީލް ވިދާޅުވީ ރައީސް އިބްރާހިމް މުހައްމަދު ސޯލިހަކީ ރާއްޖެ މިހާތަނަށް ނުދެކޭހާ ލަސް އަދި ވިސްނުން ކޮށި ބޭފުޅެއްކަން މިވީހާ ތަނުން ސާބިތު ވެފައިވާ ކަމަށެވެ.

"ރައްޔިތުންނަށް ހެޔޮއެދޭނަމަ އެގްޒިޓް ޕްލޭން ކުރައްވާ. އިތުރަށް ފަސް އަހަރަށް ރައްޔިތުންނަށް ވޭން ދިނުމަކީ އޯގާތެރި ސިފައެއް ނޫން،" ރައީސް ސޯލިހަށް އަމާޒު ކުރައްވައި، ޖަމީލް ވިދާޅުވި އެވެ.

ފަސް އަހަރުގެ އެއް ދައުރަށް ވުރެ ދިގު ކޮށް މިހާތަނަށް އައިރު ރާއްޖޭގެ ޑިމޮކްރަސީގައި ވެރިކަން ކުރެވިފައި ނުވާކަން ފާހަގަކޮށްލެއެވެ.

ރައީސް އިބްރާހީމް މުޙައްމަދުގެ ސަރުކާރަކީ ގިނަ ކަންކަން ކުރުމުގައި ދުވެލި ދަށް ސަރުކާރެއްގެ ގޮތުގައި އިދިކޮޅުންނާއި އެމްޑީޕީއަށް ތާއީދު ކުރައްވާ ބައެއް ބޭފުޅުން ވެސް އަބަދުވެސް ސިފަ ކުރެއެވެ. މިގޮތުން ރިޔާސީ ބައެއް ވަޢުދުތައް މިވީހާތަނަށް ނުފުއްދިފައިވާއިރު، އިދިކޮޅުން ފާހަގަ ކުރަމުން ދަނީ މިއީ ރައީސް ޞާލިޙްގެ ނާޤާބިލިއްޔަތުކަން ކަމަށެވެ.