ލައިސަންސް ޖޫރިމަނާގެ ސަބަބުން ކައިވެނިނުކޮށްދޭ ކަމަށް ރައީސް ވިދާޅުވީ އިތުރުފުޅެއް
ލައިސަންސު ނެތި ޖޫރިމަނާ ކޮށްފައިވާ ޢުމުރުން 18 އަހަރުން ދަށުގެ ކުދިންނަށް ދިރިއުޅުން ނުފެށި ކައިވެނި ނުކުރެވޭ ވަރަށް މައްސަލަ ހައްލު ކޮށްދޭނެ ކަމަށް ވިދާޅުވެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ދެއްކެވި ވާހަކަފުޅަށް ގިނަ ފާޑު ކިޔުންތަކެއް އަމާޒު ވެއްޖެއެވެ.
އެމްޑީޕީން ކުރިއަށް ގެންދާ ރަށްވެހި ފަތިސް ކެންޕެއިންގައި އަތޮޅުތަކުގެ ރަށްރަށަށް ސުވާލު ކުރުމަށް ހުޅުވާލައިގެން ރޭ ބޭއްވި ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ ޖޫރިމަނާގެ މައްސަލައަކީ މާލޭގެ އިތުރުން އަތޮޅު ތެރޭގައި ވެސް ވަރަށް ބޮޑަށް އޮތް މައްސަލައެއް ކަމަށާއި މި މައްސަލަ ހައްލު ކުރުމަށް އަވަސް ފިޔަވަޅުތަކެއް އަޅުއްވާނެ ކަމަށެވެ.
ރައީސް ވަނީ ޖޫރިމަނާގެ ސަބަބުން ގިނަ މައްސަލަތަކެއް ކުރިމަތިވާ ކަން ވެސް ފާހަގަކޮށްފައެވެ.
"މީގަ އެބަ ދިމާވާ ކަމެއް އޮންނަ ކަމަށް ވަނީ ޖޫރިމަނާ ދައްކަން އޮވެއްޖެއްޔާ ކައިވެނި ވެސް ނުކުރެވޭ، ބައެއް ކުދިންނަށް ކައިވެނި ވެސް ނުކުރެވިފައި އެބަ ހުރި. ދިޔައީމަ ކޯޓުން އެބަ ބުނޭ އެބަ އޮތޭ ޖޫރިމަނާއެއް، ޖޫރިމަނާ ނުދައްކަނީ ހެން ނުކުރެވޭ. އެހެން ތިބި އެތައް ކުދިންނެއް އެބަ ތިބި،" ރައީސް ޞާލިހު ވިދާޅުވިއެވެ.
ރައީސް ޞާލިހު މިފަދައިން ވިދާޅުވި ނަމަވެސް ޓްރެފިކް ޖޫރިމަނާ ނުދައްކައި އޮތް ނަމަ ކައިވެނި ނުކުރެވޭނެ ކަމަކަށް ގާނޫނުގައެއް ނޯވެއެވެ. އަދި އެއްވެސް ކޯޓަކުން އެގޮތަށް އަމަލެއް ވެސް ނުކުރެއެވެ.
ލައިސަންސް ނުހޯދައި އުޅަނދުފަހަރު ދުއްވައިފިނަމަ ގާނޫނުގައި ބަޔާން ކުރާ އަދަބަކީ ފުރަތަމަ ފަހަރަށްނަމަ 1000 ރުފިޔާއިން ޖޫރިމަނާ ކުރުމެވެ. ދެ ވަނަ ފަހަރު ނަމަ 1500 ރުފިޔާއިން ޖޫރިމަނާ ކުރުމެވެ. އަދި ދެ ފަހަރަށް ވުރެ ގިނަ ފަހަރަށް ނަމަ، އިތުރުވާ ކޮންމެ ފަހަރަކަށް 2000 ރުފިޔާއިން ޖޫރިމަނާ ކުރުމެވެ.
ނަމަވެސް ލައިސަންސް ނުހޯދައި ޖޫރިމަނާ ކުރުމުން އެ ފައިސާ ދެއްކުމަކީ ކައިވެނި ކޮށްދިނުމުގައި އޮންނަ ފެމިލީ ކޯޓުގެ ގަވާއިދުގައިވާ ޝަރުތުތަކުގެ ތެރޭގައި ހިމެނޭ ކަމެއް ނޫނެވެ. ކައިވެނި ކޮށްދިނުމުގެ ކުރިން ދައްކަން ޖެހޭ ފައިސާގެ ތެރޭގައި ހިމެނެނީ ހަމައެކަނި ގާނޫނާ ހިލާފަށް ކޯޓުން ބޭރުގައި ވަރި ކޮށްފައި ވާނަމަ ވަރީގެ ޖޫރިމަނާ ފައިސާއާއި، އާއިލާއާ ބެހޭ ގާނޫނުގެ ދަށުން ކައިވެނި ކުރުމަށް އެދޭ ފަރާތް ދައްކަން ޖެހި ނުދައްކައިވާ ކުދިންގެ ޚަރަދު ފައިސާއާއި، އިއްދައިގެ ޚަރަދު ފައިސާ ނުވަތަ އަނބިމީހާގެ ޚަރަދު ފައިސާއެވެ.
ވާނުވާ