އަނިލް ކަޕޫރު މިހާރު ކުރާ ކަމަކީ ހަމަ ދުވުން
ބޮލީވުޑް މަޝްހޫރު ތަރި އަނިލް ކަޕޫރަކީ ގިނަ ބައެއްގެ "ފޭވަރިޓް" އެކެވެ. އޭނާ ގިނަ ބައެއްގެ މަގުބޫލުކަން ހޯދާފައިވަނީ ހަމައެކަނި ފިލްމީ ދާއިރާއަކުން ނޫނެވެ. އެތައް ބައިވަރު ގޮތަކުން ވެސް އަނިލް ކަޕޫރަކީ ގިނަ ބައެއްގެ އިންސްޕިރޭޝަނެކެވެ.
އުމުރު ކިތަންމެ ދޮށި ނަމަވެސް އޭނާ ގެ އުމުރަކީ ހަމައެކަނި ނަންބަރެއް ކަން ސާބިތު ކޮށްދީ އަނިލް ކަޕޫރު ވަނީ ފިޓްނަސް ލެވެލް އެއްވަރެއްގައި ހިފަހައްޓާފައެވެ. އެގޮތުން މިދިޔަ ބުދަ ދުވަހު ދުވަމުން ދާ މަންޒަރު ފެންނަ ވީޑިއޯއެއް ވަނީ އޭނާ ސޯޝާލް މީޑިއާގައި އާންމުކޮށްފައެވެ. 40 އަހަރު ވަންދެން ބޮލީވުޑުގައި މަސައްކަތް ކުރި އަނިލް ކަޕޫރަކީ މުޅި އެ ދާއިރާގައި ވެސް ދޮށީ އުމުރުގެ މީހުންގެ ތެރެއިން އެންމެ ފިޓު މީހާގެ ގޮތުގައި ފާހަގަކޮށްލެވެއެވެ. އަދި އޭނާ ސޯޝަލް މީޑިއާގައި އާންމުކޮށްފައިވާ މި ވީޑިއޯއިން އެކަން ވަރަށް ރަނގަޅަށް ސާބިތުވެއެވެ.
އޭނާގެ މި ވިޑިއޯއަށް ގިނަ ބަޔަކު ވަނީ ކޮމެންޓު ކޮށްފައެވެ. އެގޮތުން އޭނާ އަކީ ވަޔަށް ވުރެ ބާރަށް ދުވާ މީިހެއް ކަމަށާއި، އޭނާގެ އުމުރަކީ 64 އަހަރުކަން ގަބޫލުކުރަން ވެސް ދަތި ކަމަށް ގިނަ ބަޔަކު ވަނީ ކޮމެންޓު ސެކްޝަނުގައި ބުނެފައެވެ. މީގެ އިތުރުން އުމުރަކީ މީހާ ބަލިކަށިކޮށްދޭ ކަމެއް ނޫން ކަމަށާއި، އުމުރަކީ ހަމައެކަނި ނަމްބަރެއްކަން އޭނާ ސާބިތުކޮށްދީފައިވާ ކަމަށް ވެސް ގިނަ ބަޔަކު ވަނީ ކޮމެންޓު ކޮށްފައެވެ.
އަނިލް ކަޕޫރުގެ ފާހަގަ ކޮށްލެވޭ ބައެއް ފިލްމުތަކުގެ ތެރޭގައި މިސްޓަރ އިންޑިއާ، ނޯ އެންޓްރީ، އަދި މަލަންގު ފާހަގަ ކޮށްލެވެއެވެ.
