ޗެނަލް 13ގެ ޕްރޮގްރާމެއްގައި ފުލުހުންނަށް އިންޒާރުދިން ކަމަށް ބުނާމީހާ ދޫކޮށްލައިފި
ޗެނަލް 13ގެ ޕްރޮގްރާމެއްގައި ފުލުހުންނަށް އިންޒާރު ދިން ކަމަށް ބުނެ ހައްޔަރު ކުރި ޕީޕީއެމްގެ އެކްޓިވިސްޓު ދޫކޮށްލައިފިއެވެ.
އެ މައްސަލައިގައި ކޯޓު އަމުރެއްގެ ދަށުން ފުލުހުން ހައްޔަރުކުރީ ގއ.ކޮލަމާފުށީ އުމުރުން 51 އަހަރުގެ އަބްދުއްސަމަދެވެ.
ކޯޓަށް ހާޒިރު ކުރުމުން ހެއްކަށް ނުފޫޒު ފޯރުވާފާނެތީ އޭނާ ބަންދު ކޮށްދިނުމަށް ފުލުހުން އެދުނު ނަމަވެސް، ކޯޓުން އޭނާ ވަނީ ދޫކޮށްލާފައެވެ.
ފުލުހުން މީގެ ކުރިން ބުނި ގޮތުގައި އޭނާ ހައްޔަރު ކުރީ ޓީވީ ޗެނަލަކުން ގެނެސްދިން އިންޓަވިއުއެއްގައި ފުލުހުންނަށް ހެކިބަސް ދޭ މީހުންނަށް އިންޒާރު ދީ ބިރު ދެއްކި މައްސަލައެއްގައެވެ.
މި މީހާ ހައްޔަރު ކުރަން އަމުރު ނެރުނީ ކްރިމިނަލް ކޯޓުންނެވެ. އެ އަމުރުގައި ވާ ގޮތުން މި މީހާ ހައްޔަރު ކުރެވުނީ ޗެނަލް 13 އަށް ދީފައިވާ ލައިވް އިންޓަވިއުއެއްގައި ފުލުހުންނަށް ނިސްބަތްކޮށް އެ ފުލުހުން ކޮށާލާނެ ކަމަށް ބުނެ ބިރު ދައްކާ އިންޒާރުދިން ކަމަށް ތުހުމަތު ކުރެވުނު މައްސަލައިގައި ކަމަށެވެ.
މި މީހާ ހައްޔަރު ކުރާ ސަބަބެއް ކަމުގައި މި އަމުރުގައި ބުނެފައި ވަނީ މުޖުތަމައުގެ ސަލާމަތާއި ރައްކާތެރިކަމަށް ޓަކައި އަދި ހެކި ފޮރުވާ، ހެކި ނައްތާލަން މަސައްކަތް ކޮށްފާނެ ކަމަށް ފެންނާތީ ކަމަށެވެ.
