ސާވިސް ޗާޖުގެ ގޮތުގައި ވެލާއިން ބައި ލައްކަ އެއްހާ ރުފިޔާ
ވެލާ ޕްރައިވެޓް ލިމިޓެޑް ރިސޯޓުން ފެބްރުއަރީ މަހުގެ ސާވިސް ޗާޖުގެ ގޮތުގައި 3،055 ޑޮލަރު ދީފިއެވެ. މިއީ ދިވެހި ރުފިޔާއިން ބަލާނަމަ ގާތްގަނޑަކަށް 47،108 ރުފިޔާއެވެ.
ރިސޯޓުތަކުގެ ސާވިސް ޗާޖު އާންމުކުރާ ރިސޯޓު ބޯއިސް ޕޭޖުގައިވާ ގޮތުން ފެބްރުއަރީ މަހު 3055 ޑޮލަރު އަދި ޖެނުއަރީ މަހު 4079.10 ޑޮލަރު ވަނީ ވިލާ ރިސޯޓުގެ މުވައްޒަފުންނަށް ދީފައި ވެއެވެ.
ކޮވިޑު-19 ގެ މި ދަނޑިވަޅުގައި އެންމެ ބޮޑު ސާވިސް ޗާޖެއް ދޭ ރިސޯޓެއްގެ ގޮތުގައި މި ރިސޯޓު ވެފައިވާއިރު، ކޮވިޑު-19 ގެ ކުރިން ވެސް އެންމެ ބޮޑު ސާވިސް ޗާޖު ދޭ ރިސޯޓުތަކުގެ ތެރޭގައި ވެލާ ޕްރައިވެޓް ލިމިޓެޑް ރިސޯޓު އަބަދުވެސް ފާހަގަ ކުރެވެއެވެ.
ރާއްޖޭގައި ވެސް މިދިޔަ އަހަރު ކޮވިޑް-19 ހަލުވިކަމާއެކު ފެތުރުމާ ގުޅިގެން، ބޯޑަރުތައް ބަންދު ކުރިއެވެ. އެކަމާ ގުޅިގެން ފަތުރުވެރިކަމަށް އަސަރުކޮށް އެ ދާއިރާގައި މަސައްކަތް ކުރަމުން ދިޔަ ވަރަށް ގިނަ މުވައްޒަފުންގެ ވަޒީފާ ގެއްލުނެވެ.
އެއިރު ވެލާ ރިސޯޓްގެ އޮޕަރޭޝަން ވެސް ހުއްޓާލި ނަމަވެސް، ރިސޯޓުން ބޭރުގައި ތިބި މުވައްޒަފުންގެ ތެރެއިން 600 ޑޮލަރަށްވުރެ ކުޑަ މުސާރައެއް ލިބޭ މުވައްޒަފުންނަށް އަސާސީ މުސާރައާ އެކު އިތުރު 200 ޑޮލަރުގެ އެލަވަންސެއް އެރިސޯޓުން ދިނެވެ. އަދި 600 ޑޮލަރަށް ވުރެ ބޮޑު މުސާރަ ލިބޭ މީހުންނަށް، މުސާރައާއެކު އިތުރު އެލަވެންސްގެ ގޮތުގައި 100 ޑޮލަރު ދިންކަން ވެސް އެނގިފައިވެއެވެ.
