ހައްދުންމަތީ ވިޔަފާރި ބަނދަރުގެ "ފީސިބިލިޓީ" ވަނީ ބަލައި ނިމިފައި : ރައީސް
ހައްދުންމަތީ ގާދޫގައި ބައިނަލްއަގުވާމީ ވިޔަފާރި ބަނދަރެއް ތަރައްޤީ ކުރުމަށް ހަދަންޖެހޭ "ފީސިބިލިޓީ ސްޓަޑީސް" ހަދައި ނިމިފައިވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވެފައި ވަނީ ކުރިއަށް އޮތް ލޯކަލް ކައުންސިލް އިންތިޚާބަށް ވެރިކަންކުރާ މައިޕާޓީ އެމްޑީޕީން ކުރިއަށްގެންދާ "ރަށްވެހި ފަތިސް" ކެމްޕެއިން ބައްދަލުވުމުގައި ވާހަކަފުޅު ދައްކަވަމުންނެވެ. ރައީސް ވިދާޅުވީ ވިޔަފާރި ބަނދަރެއް ތަރައްޤީކުރުމަށް ބަލަންޖެހޭ ކަންކަން ބަލައި ނިމިފައިވާކަމަށެވެ.
އަދި ލ.އަތޮޅަކީ ތަރައްޤީގެ މަޝްރޫޢުގައި ބޮޑު ސެންޓަރެއްގެ ގޮތުގައި ތަރައްޤީކުރުމަށް ނިންމާފައިވާ ސަރަހައްދެއް ކަމަށާއި އެ އަތޮޅަކީ އާބާދީއާ ތަރައްޤީ އެއްފަސްވެގެންދާނެ އެއް ސަރަޙައްދުގެ ގޮތުގައި ޤަބޫލުކުރެވޭ ކަމަށެވެ.
"ލ.އަތޮޅަކީ އަޅުގަނޑުމެންގެ ތަރައްޤީގެ މަޝްރޫޢުގައި ބޮޑު ސެންޓަރެއްގެ ގޮތުގައި ތަރައްޤީކުރުމަށް ނިންމާފައިވާ ސަރަހައްދެއް. އެގޮތުން ވައިގެ ބަނދަރާއި، ކަނޑުމަގުން ކޮމާޝަލް ޕޯޓާއި ސިއްޙީ ދާއިރާއާއި، ތަޢުލީމީ ދާއިރާއާއި ޚާއްޞަކޮށް ޓޫރިޒަމްގެ ދާއިރާއަށްވެސް މުހިންމުކަން ދީގެން ކުރިއަށް މިގެންދަނީ. އާބާދީއާ ތަރައްޤީ އެއްފަސްވެގެންދާނެ އެއް ސަރަޙައްދުގެ ގޮތުގައި އަޅުގަނޑުމެންނަށް ވެސް ޤަބޫލުކުރެވޭ." ރައީސް ވިދާޅުވިއެވެ.
މި އަހަރުގެ ތެރޭގައި ހައްދުންމަތިން ފަތުރުވެރިކަމަށް ރަށްތަކެއް ހުލުވާލުމަށް ވެސް ނިންމަވާފައިވާ ކަމަށާއި، އެއީ ކަށިދޫއާއި، ބޮޑުމުނިޔަފުއްޓާއި، ދޮންބެރަހާ އާއި، ހޮޅުރަހާ ކަމުގައި ރައީސް ވިދާޅުވިއެވެ.
