މި ސަރުކާރު މިހާރު ނުވެއްޓި މި އޮތީ އެޗްޕީއޭގެ ސަބަބުން: އަދުރޭ
ރައީސް އިބްރާހިމް މުހައްމަދު ޞާލިޙުގެ ސަރުކާރު ދަމަހައްޓަން ބޭނުންކުރާ ތަނބަކީ ހެލްތު ޕްރޮޓެކްޝަން އެޖެންސީ (އެޗްޕީއޭ)އަށް ހަދާފައިވާ ކަމަށާއި، މި ސަރުކާރު ނުވެއްޓި އޮތީ އެޗްޕީއޭގެ ސަބަބުން ކަމަށް އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އަދުރޭ މިހެން ވިދާޅުވެފައި ވަނީ ކެމްޕޭން އަލުން ރީލޯންޗު ކުރުމަށް ހޮނިހިރު ދުވަހުގެ ރޭ ބޭއްވި ޖަލްސާގައި ވާހަކަދައްކަމުންނެވެ. އަދުރޭ ވިދާޅުވީ އެޗްޕީއޭއަކީ މި ސަރުކާރުގައި ވިއްދާފައި ހުރި މުޑިއެއް ކަމަށެވެ.
“އޭގެ ފަހުން ތަފާތު ގައިޑްލައިންތައް ނެރެމުން ގެންދަން ފެށި. އޭގެ ފަހުން އެޗްޕީއޭއަކީ މި ސަރުކާރުގައި ވިއްދާފައި ހުރި މުޑިއަކަށް ހެދި. މި ސަރުކާރު މިހާރު ނުވެއްޓި މި އޮތީ އެޗްޕީއޭގެ ސަބަބުން.” އަދުރޭ ވިދާޅުވިއެވެ.
އިތުރަށް އަދުރޭ ވިދާޅުވީ ކޮވިޑް-19ގެ ހާލަތު ރާއްޖޭގައި އަނެއްކާ ގޯސްވެއްޖެ ކަމަށް ބުނެ ދައްކަމުން ދަނީ ދެކޮޅުނުޖެހޭ ވާހަކަތަކެއް ކަމަށެވެ. އަދި އެއީ މަގޭ ރާއްޖެ ލޯންޗިންގެ ފުރަތަމަ ޖަލްސާގެ ފަހުން ކުރިމަތިކުރުވައިގެން އުޅޭ ހުރަހެއް ކަމަށް ވެސް ވިދާޅުވިއެވެ.
މީގެ އިތުރުން އަދުރޭ ވިދާޅުވީ ރައީސް ޔާމީން ޖަލުގައި އޮންނަވާތީ ރާއްޖޭގެ އެންމެން ކަރުނަ އަޅާ ރޯކަމަށެވެ. އަދި މި ސަރުކާރުން ކެމްޕޭނު ކުރަން އިދިކޮޅު ފަރާތްތަކަށް ފުރުސަތު ނުދެއްވާ ކަމަށް ވެސް އޭނާ ވިދާޅުވިއެވެ.
Ads by STO
