ވެކްސިންގެ 2 ޑޯޒް ފުރިހަމަ ކުރާ ފަރާތްތަކަށް މާސްކު ނާޅާ އުޅެވޭ ގޮތަށް އުސޫލެއް
(އޭބީސީ ނިއުސް، ނިއުޔޯކް) ވެކްސިންގެ 2 ޑޯޒް ފުރިހަމަ ކުރާ ފަރާތްތަކަށް މާސްކު ނާޅާ އަދި ގައިދުރު ކަމެއް ނެތި އުޅެވޭނެ އުސޫލެއް އެމެރިކާގެ ސެންޓަރ ފޯރ ޑިޒީސް ކޮންޓްރޯލް (ސީޑީސީ) އިން އާއްމުކޮށްފިއެވެ،
ސީޑީސީން އާއްމު ކުރި އުސޫލުގައި ބުނެފައިވަނީ، 2 ޑޯޒްގެ ވެކްސިން ޖަހާފައި ފަރާތްތައް ، ބަންދުކޮށްފައި ހުރި ތަނަކަށް އެއްވާނަމަ ގައިދުރު ކުރުން މަޖުބޫރު ނޫން ކަަމަށާއި އަދި މާސްކް އެޅުން ވެސް މަޖުބޫރު ނޫން ކަމަށެވެ.
މިގޮތަށް އެމެރިކާގެ ގައިޑްލައިން އެކުލަވާލާފައި ވަނީ ވެކްސިން ޖަހުމަށް ބާރު އެޅުމުގެ ގޮތުންނެވެ. މިގޮތަށް ކުރިޔަށް އޮތް ކައިރި މުސްތަޤްބަލެއްގައި ވެކްސިން ޖަހާ ފަރާތްތަކަށް އިތުރު ލުއިތައް ދެވިގެންދާނެ ކަމަށް އެމެރިކާގެ މީޑިއާތަކުން ރިޕޯޓް ކުރެއެވެ.
އެމެރިކާއިން އާއްމު ކުރި މި އުސޫލާއެކު، ވެކްސިން ޖަހާފައިވާ ފަރާތްތަކަށް އާއްމު އުސޫލެއްގެ މަތިން ޖަލްސާތައް ބޭއްވުމުގެ ހުއްދަ ވަނީ ދީފައެވެ. އަދި އިތުުރު މީހުންނަށް ނުވަދެވޭ ތަނެއްގައި ނުވަތަ ކައިރި ނުވެވޭ ތަނެއްގައި ޖަލްސާއެއް ނުވަތަ ހަފްލާއެއް ބާއްވާނަމަ ގައިދުރު ނުކޮށް، ކޮވިޑް-19 ގެ ކުރިން ޖަލްސާ ބޭއްވި ގޮތަށް ބޭއްވުމުގެ ހުއްދަވަނީ ދީފައެވެ.
ސީޑީސީ އިން ބުނެފައި ވަނީ މިއީ، ނޯމަލް އަށް ދިއުމަށް ކުރެވޭ މަސައްކަތުގެ ފުރަތަމަ ފިޔަވަޅު ކަމަށާއި ވެކްސިން ޕްރޮގްރާމް ކާމިޔާބު ކަމާއެކު ގެންދެވިއްޖެނަމަ އިތުރު ލުއިތައް ދޭނެ ކަަމަށެވެ.
ވެކްސިންގެ 2 ޑޯޒް ފުރިހަމަ ކުރާ ފަރާތްތަކަށް ބައެއް ލުއިތައް ދިން ނަމަވެސް، މީހުން އެއްވާ ތަންތަނަށް ދާއިރު މާސްކް އެޅުމަށާއި، ވެކްސިން ނުޖަހާ މީހުން ބައިވެރިވާ އެއްވުމެއްގައި ބައިވެރިވާނަމަ ގައިދުރުކަން އިޚްތިޔާރު ކުރުމަށް ސީޑީސީން އިރުޝާދު ދެއެވެ. އަދި ވެކްސިން ދެ ޑޯޒް ފުރިހަމަ ކުރިކަމުގައި ވީނަމަވެސް ކޮވިޑް-19ގެ އަލާމާތެއް ފެންނަނަމަ ޑަކްޓަރަށް ދެއްކުމަށް އެފަރާތުން ވަނީ އެދިފައެވެ.
މިއަދާ ހަމައަށް އެމެރިކާގައި 31 މިލިޔަން މީހުންނަށް ވެކްސިން ވަނީ ދީފައެވެ. މިއީ އެމެރިކާގެ އާބާދީގެ އެންމެ 9 އިންސައްތައެވެ. ފަހުގެ ދިރާސާތަކުން ދައްކާ ގޮތުގައި ވެކްސިނުގެ އަސަރު ރަނގަޅަށް ކުރަނީ ވެކްސިންގެ ދެވަނަ ޑޯޒް ފުރިހަމަ ކުރާތާ 2 ހަފްތާ ފަހުންނެވެ.
Ads by STO
