ސުލޫކީ ކޮމިޓީ ކީއްކުރަންތޯ، މަޖިލިހުގެ ތަޅުމަށް އަލުން ހާޒިރުވާން އެންގިޔަސް ތައްޔާރު: މަލީޙް
ރައްޔިތުންގެ މަޖިލީހުގެ އިމްތިޔާޒް އަދި ސުލޫކީ ކޮމިޓީއަށާއި، މަޖިލީހުގެ ތަޅުމަށް އަލުން ހާޒިރުވާން ޖެހުން ނަމަވެސް ތައްޔާރަށް ހުންނެވި ކަމަށް ކުރީގެ ކޮމިއުނިކޭޝަން، ސައިންސް އެންޑް ޓެކްނޮލޮޖީ މިނިސްޓަރު މުޙައްމަދު މަލީޙް ޖަމާލް ވިދާޅުވެއްޖެއެވެ.
މަޖިލީހުގެ ސުލޫކީ ކޮމިޓީއަށް މަލީޙް ހާޒިރުކުރަން ނިންމާފައި ވަނީ، ވަޒީރުންނަށް ރައްޔިތުންގެ މަޖިލީހުގެ މެމްބަރުން ބިރުދައްކަވާ ކަމަށް ތުހުމަތު ކުރައްވައި އެމަނިކުފާނު ވާހަކަ ދެއްކެވި މައްސަލައިގައެވެ.
އެކޮމިޓީއަށް މަލީޙް ހާޒިރު ކުރަން ނިންމާ، މިއަދު އެކަން އިއުލާނު ކުރުމާ ގުޅިގެން މަލީޙް ކުރެއްވި ޓްވީޓެއްގައި ވިދާޅުވީ ސުލޫކީ ކޮމިޓީއަށް ހާޒިރުވާން ތައްޔާރަށް ހުރި ކަމަށާއި، މަޖިލީހުގެ ތަޅުމަށް އަލުން ހާޒިރުވާން ޖެހިއްޖެނަމަ އެކަމަށް ވެސް ތައްޔާރަށް ހުންނެވި ކަމަށެވެ.
"ތައްޔާރު ވެގެން ދާން ބޭނުން ވަނީ އެންމެ ފަސް މިނެޓު. ތިބޭފުޅުންނަށް ބިރު ދެއްކޭނީ އެހެން މީހުންނަށް. އަޅުގަނޑު ކުޑަކޮށްވެސް ޖެހިލުމެއް ނުވޭ. ޑަރު ވެސް ހިތަށް ނާރާ" މަލީޙް ވިދާޅުވިއެވެ.
މަލީޙުގެ އިތުބާރު ނެތްކަމަށް ވޯޓު ނެގި ދުވަހު ޖަވާބުދާރީވާން ދެއްވި ފުރުސަތުގައި އެމަނިކުފާނު ވަނީ، މެމްބަރުން ވަޒީރުންނަށް ބިރު ދައްކަވާކަމަށް ތުހުމަތު ކުރައްވާފައެވެ. އެގޮތުން ކުރީގެ ޖެންޑާ މިނިސްޓަރު ޝިދާތާ ޝަރީފް އިސްތިއުފާ ދެއްވީ ވެސް މަޖިލީހުގެ ބައެއް މެމްބަރުން ބިރު ދެއްކެވުމުން ކަމަށް މަލީޙް ވިދާޅުވިއެވެ.
ރައްޔިތުންގެ މަޖިލީހުގެ އިމްތިޔާޒް އަދި ސުލޫކީ ކޮމިޓީއަށް މަލީޙް ހާޒިރުކުރަން ކޮމިޓީގެ މިއަދުގެ ބައްދަލުވުމުގައި ހުށަހެޅުއްވީ މަނަދޫ ދާއިރާގެ މެމްބަރު އަހުމަދު ހާރޫންއެވެ. ނަމަވެސް އެމަނިކުފާނު ހާޒިރު ކުރާނެ ވަކި ދުވަހެއް އަދި ކަނޑައަޅާފައެއް ނުވެއެވެ.
ބަދަލު ހިފުމުގެ ރޫހުގައި ބާރު އޮތީމަ ކަމެއްކޮސްލުމުގެ ބޭނުމުގައި ހާޟިރު ކުރަނީ.