ފޭނުންގެ ހިތްހަލާކު ކޮށްލާފައި އާމިރް ޚާން ސޯޝަލް މީޑިއާއާ ދުރަށް
މަޝްހޫރު ފިލްމީތަރި އާމިރް ޚާން، އޭނާގެ 56 ވަނަ އުފަން ދުވަހަށްފަހު ސޯޝަލް މީޑިއާއާ ދުރަށް ގޮސްފިއެވެ.
އެގޮތުން އިންސްޓަގްރާމާއި ޓްވިޓާއަށް ވެސް އަލްވަދާޢު ކިޔާފައި ކަމަށް އޭނާ ބުނެފައި ވެއެވެ.
އަބަދުވެސް ވަރަށް ތަފާތު އުފެއްދުންތައް ، އުފައްދާ އާމިރް ޚާނަކީ ސޯޝަލް މީޑިއާ ގައިވެސް ވަރަށް ތަފާތު ޕޯސްޓުތައް ކުރަމުން ގެންދާ ފަންނާނެކެވެ.
ނަމަވެސް އިއްޔެ އޭނާގެ އުފަންދުވަހު ތަހުނިޔާ ފޮނުވި އެންމެންނަށް ޝުކުރު އަދާކުރަމުން އާމިރު ޚާން ބުނީ އެއީ ސޯޝަލް މީޑިއާގައި އޭނާ ކުރާ އެންމެ ފަހު ޕޯސްޓު ކަމަށާއި، އެއަށްފަހު ސޯޝަލް މީޑިއާއާ އެއްކޮށް ދުރަށްދާން ނިންމާފައިވާ ކަމަށެވެ.
ފޭނުންނަށް ޝުކުރު އަދާކުރަމުން އާމިރު ޚާން ބުނީ، ސޯޝަލް މީޑިއާއަށް އޭނަގެ އަމިއްލަ އެކައުންޓުތަކުން އަލްވަދާއު ކީނަމަވެސް އޭނަގެ ޕްރޮޑަކްޝަން ހައުސްގެ އޮފިޝަލް އެކައުންޓުން ފޭނުންނަށް އޭނާއާ ގުޅުން ބޭއްވޭނެ ކަމަށެވެ.
އާމިރް ޚާން ގެ މިނިންމުމާއެކު އޭނާގެ އެތައް ފޭނުންނެއް ވަނީ މާޔޫސްވެ، އެމީހުންނާ ދުރަށް ނުދިޔުމަށް އެދިފައެވެ.
