އުތުރުތިލަފަޅު މައްސަލައިގައި ކޯލިޝަންގެ ބައިވެރިން ހަނުތިބޭނެ ޖާގަ އެއްނެތް: ސައީދު

އިތުރުތިލަފަޅު މައްސަލައިގައި ސަރުކާރު ކޯލިޝަންގެ ބައިވެރިން ހަނު ތިބެވޭނެ ޖާގައެއް ނެތް ކަމަށް މާވަށު ދާއިރާގެ މެންބަރު މުހައްމަދު ސައީދު ވިދާޅުވެއްޖެއެވެ.

Ads by Sosun Fihaara

އުތުރު ތިލަފަޅުގައި އިންޑިއާ ސިފައިން ބޭތިއްބުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހްގެ ސަރުކާރުން ސޮއި ކޮށްފައިވާ އެއްބަސްވުމުގެ ދަށުން އިންޑިއާ ސިފައިންނަށް ރާއްޖޭގައި 60 އަހަރު ، ހަތިޔާރާއެކު ތިބެވޭނެ ކަމަށް ބުނާ ލިޔުމެއްވަނީ ދައުރު ވެފައެވެ.

މި މައްސަލައިގައި ގިނަ ބަޔަކު ސަރުކާރަށް ފާޑުކިޔަމުން އަންނައިރު، ސަރުކާރު ކޯލިޝަންގައި ހިމެނޭ އެއްވެސް ލީޑަރަކު މިކަމާ ގުޅިގެން މިހާތަނަށް ބަހެއް ވިދާޅުވެފައި ނުވާކަން ފާހަގަ ކޮށްލެވެއެވެ.

ރާއްޖޭގައި ބޭރުގެ އަސްކަރީ ބާރަކަށް ޖާގަ ދިނުމަކީ ބަލައި ގަނެވޭނެ ކަމެއް ނޫން ކަަމަށާއި ސަރުކާރުން މިކަން ކަން ސާފުކޮށްދޭން ޖެހޭ ކަމަށް ވިދާޅުވެ، ސައީދު ވިދާޅުވީ ޤާނޫނު އަސާސީން ދަންނަ ހަމައަކީ މިފަދަ އެއްބަސްވުން މަޖިލީހަށް ހުށަހަޅައިގެން މަޖިލީހުގެ ރުހުން ހޯދުން ކަމަށެވެ.

"ޤާނޫނު އަސާސީން ދަންނަ ހަމަޔަކީ އެފަދަ އެއްބަސްވުންތައް މަޖިލީހަށް ހާމަކުރުން. މިކަމުގައި ސަރުކާރާއި، ކޯލިޝަންގެ ބައިވެރިން ހަނުތިބޭނެ ޖާގަ އެއްނެތް." ސައީދު ވިދާޅުވިއެވެ.

މި އެއްބަސްވުމާ ގުޅިގެން ޑިފެންސުން ބުނެފައި ވަނީ އެއީ އެގްރީމެންޓްގެ އަސްލު ނޫން ކަމަށެވެ. ނަމަވެސް އިންޑިޔާ ސިފައިންނަށް ދިގު މުއްދަތުގައި ރާއްޖޭގައި ނުތިބެވޭނެ ކަމަށް ބުނާ ވާހަކަ އެ ފަރާތުން ދޮގު ކޮށްފައެއް ނުވެއެވެ. އިދިކޮޅުން ދަނީ މި މައްސަލައިގައި ކަންބޮޑުވުން ފާޅު ކުރަމުންނެވެ.