ރިތޭޝް، އޭނަގެ އަނބިމީހާގެ ބޮލުގައި ފުނާއަޅުވާ ދިނުމުން އެތައް ބައެއްގެ ތަރުހީބު
ބޮލީވުޑްގެ ދެ ތަރިން ކަމުގައިވާ ރިތޭޝް ދޭޝްމުކް އާއި ޖެނީލިއާ ޑިސޫޒާ އަކީ ގިނަ ބަޔަކަށް ވަރަށް ކަމުދާ ޖޯޑެކެވެ. ކައިވެންޏަށް އެތައް އަހަރެއް ވެފައިވާއިރު، މި ދެމަފިރިންގެ މެދުގައިވާ ލޯތްބަށް ބަދަލެއް ނާންނަކަން އަދިވެސް ހާމަ ވެއެވެ.
ދާދި ފަހުން ޖެނީލިއާ އިންސްޓަގްރާމް ގައި ހިއްސާކުރި ވީޑިއޯ އަކުންވެސް މިކަން ވަނީ ހާމަވެފައެވެ. އެ ވީޑިއޯއިން ފެންނަނީ، ސްކޭޓް ކުރަނިކޮށް ލިބުނު އަނިޔާއެއްގެ ސަބަބުން އަތުގައި ޕްލާސްޓަރު އަޅާފައިވާ ޖެނިލިއާގެ ބޮލުގައި ރިތޭޝް ފުނާ އަޅާ ދެނިކޮށެވެ.
ފިރިމީހާގެ އޯގާތެރިކަން ލިބުމުން ޖެނީލިއާ ވެސް އިނީ ވަރަށް އުފަލުންނެވެ. އަދި މި ވީޑިއޯ ވެގެން ދިޔައީ އެތައް ބަޔަކަށް ވަރަށް ކަމުދިޔަ ވީޑިއޯ އަކަށެވެ. އިންސްޓަގްރާމްގައި އެ ވީޑިއޯ ހިއްސާ ކޮށްފައިވާއިރު، އެއަށް 6.7 ލައްކަ އަކަށްވުރެ ގިނަ ލައިކްސް ވަނީ ލިބިފައެވެ.
ޕޯސްޓަށް ކޮމެންޓުކުރި މީހުންގެ ތެރޭގައި ރިތޭޝްގެ ދައްތަ ވެސް ހިމެނެއެވެ. އޭނާވެސް ވަނީ ރިތޭޝަށް ވަރަށް ތައުރީފު ކޮށްފައެވެ.
ޖެނީލިއާ އަށް އަނިޔާވީ، އޭނަގެ ދަރިން ގޮވައިގެން ސްކޭޓް ކުރަން ދާން ބޭނުން ވެގެން، އޭގެ ކުރިން އަމިއްލައަށް ސްކޭޓް ކުރަން ދަސްކުރަން އުޅުމުގެ ތެރޭގައި ވެއްޓިގެން ކަމަށް އޭނާ ބުނެފައިވެއެވެ. ބައިނަލްއަގުވާމީ އަންހެނުންގެ ދުވަހު ހިއްސާކުރި ޕޯސްޓެއްގައި، އެވާހަކަ ކިޔައިދެމުން އޭނާ ބުނީ ސްކޭޓް ކުރަން ދަސްވޭތޯ އަދިވެސް މަސައްކަތް ކުރާނެ ކަމަށެވެ.
