ކައުންސިލު އިންތިހާބަށް ޑީއާރްޕީން ތާއީދުކޮށް އެންޑޯސް ކުރަނީ އެމްޑީޕީ ކެންޑިޑޭޓުން: ޖާބިރު

ކުރިއަށް އޮތް ލޯކަލް ކައުންސިލު އިންތިހާބަށް ދިވެހި ރައްޔިތުންގެ ޕާޓީ (ޑީއާރްޕީ) އިން ތާއީދުކޮށް އެންޑޯސް ކުރަނީ ވެރިކަން ކުރާ އެމްޑީޕީގެ ކެންޑިޑޭޓުން ކަމަށް ޑީއާރްޕީގެ ލީޑަރ އަދި ކާށިދޫ ދާއިރާގެ މެމްބަރ ޢަބްދުﷲ ޖާބިރު ވިދާޅުވެއްޖެއެވެ.

Ads by STELCO

ރާއްޖެޓީވީގެ ޕްރޮގްރާމެއްގައި ބައިވެރިވެ ވަޑައިގެން ވާހަކަ ދައްކަވަމުން ޖާބިރު ވިދާޅުވީ، އިންތިޚާބުގެ އެންމެ ގޮނޑިއެއް ވެސް ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމާއި އެމަނިކުފާނުގެ އާއިލާ މެމްބަރަކު ނިސްބަތްވެވަޑައިގަންނަވާ ޕާޓީއަކަށް ވެސް ނުދެއްވުމަށް އެދިލައްވާ ކަމަށެވެ.

ކައުންސިލް އިންތިޚާބާ ގުޅިގެން "ވަރަށް ގިނަ ހިސާބު ޖައްސަވާފައިވާ" ކަމަށާއި، ޑީއާރްޕީން އެންޑޯސް ކުރާނީ އެމްޑީޕީގެ ކެނޑިޑޭޓުން ކަމަށް ވެސް ޖާބިރު ވިދާޅުވިއެވެ.

"ވަރަށް ގިނަ ހިސާބު ޖައްސަވާފައި ދެއްތޯ ވާހަކަ ދައްކަވާނީ، ހުރިހާ ގޮތަކުން ބެލި އިރުވެސް ހަމަ އެންޑޯސް ކުރަނީ އެމްޑީޕީ ކެނޑިޑޭޓުންނަށް ޑީއާރްޕީން އިނގޭތޯ" ޖާބިރު ވިދާޅުވިއެވެ.

މީގެ އިތުރުން ޖާބިރު ވިދާޅުވީ، ލާމަރުކަޒީ ނިޒާމުގެ ޙަޤީޤީ މާނައަކީ އެރަށެއްގައި ކުރަން ހުރި ކަންކަން ރަށު ފެންވަރުގައި ޙާސިލުވެގެން ދިއުން ކަމަށެވެ.

ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިހާބު ބޭއްވުމަށް ހަމަޖެހިފައިވަނީ އަންނަ މަހުގެ 10 ވަނަ ދުވަހުގައެވެ. އިންތިހާބަށް މިހާރު ޕާޓީތަކުން ކެމްޕެއިން ކުރަމުންދާއިރު، ކެމްޕެއިނު ކުރުމަށް ހަމަހަމަ ފުރުސަތު ދީފައި ނުވާކަމުގެ އަޑުތައް ވެސް ވަނީ ގަދަވެފައެވެ.