ކެފޭތައް ހުޅުވާފައި ބެހެއްޓޭ ވަގުތު އިތުރުކޮށްފި
ކެފޭތައް ހުޅުވާފައި ބެހެއްޓޭ ވަގުތު ކުޑަކަމުން އެ ވިޔަފާރީގައި ހަރަކާތްތެރިވާ ވިޔަފާރިވެރީންނާއި އާންމުންގެ ޕްރެޝަރު ބޮޑުވެ، ރޭގަނޑު 10:30 އާ ހަމައަށް ކެފޭ، ރެސްޓޯރެންޓުތައް ހުޅުވާފައި ބަހައްޓާ ގޮތަށް ނިންމައިފިއެވެ.
އެޗްޕީއޭއިން އާންމުކުރި އިއުލާނެއްގައި މިއަދު ބުނީ ކާބޯތަކެތީގެ ޚިދުމަތް ފޯރުކޮށްދޭ ތަންތަން ރޭގަނޑުގެ 10.30 އާ ހަމައަށް ހުޅުވާފައި ބެހެއްޓޭނެ ކަމަށެވެ. އަދި އެ އެންގުމުގައި ބުނެފައި ވަނީ މި ފިޔަވަޅުތަކަށް މިއަދުން ފެށިގެން އަމަލު ކުރާނެ ކަމަށެވެ.
ކޮވިޑް19 އިން ރައްކާތެރިވުމުގެ ގޮތުން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އަޅާފައިވާ ފިޔަވަޅުތަކުގެ ސަބަބުން ކެފޭ ރެސްޓޯރަންޓުތަކުގެ ވިޔަފާރިތަކަށް ބޮޑެތި ގެއްލުންތަކެއް ލިބެމުން އަންނާތީ ރެސްޓޯރެންޓް އެސޯސިއޭޝަން އޮފް މޯލްޑިވްސް އާއި މޯލްޑިވްސް އީޓަރީ ޔޫނިއަން އިސްނަގައިގެން ވަނީ އަނެއްކާ ވެސް ހަޅުތާލެއް ކުރަން ނިންމާފައެވެ.
މާލެ ސަރަޙައްދުގައި މިހާރު އަޅާފައިވާ ފިޔަވަޅުތަކަށް ބަލާއިރު ހަވީރު 6:00 އިން ހެނދުނު ހަޔަކަށް އިންޖީނުލީ އުޅަނދު ދުއްވުން ވެސް ވަނީ މަނާ ކޮށްފައެވެ. އަދި ފިހާރަތައް ރޭގަނޑު 10:30 ގައި ބަންދު ކުރަން ޖެހެއެވެ.
