އަންގާރަ ދުވަހު މުޢިއްޒު އޭސީސީއަށް ހާޒިރު ކުރަނީ
އެންޓި ކޮރަޕްޝަން ކޮމިޝަން (އޭސީސީ) އިން ބަލަމުން ގެންދާ މައްސަލައަކާ ގުޅިގެން އެކޮމިޝަނަށް ކުރީގެ ހައުސިންގ މިނިސްޓަރ ޑރ. މުޙައްމަދު މުޢިއްޒު ހާޒިރުވާން އަންގައިފިއެވެ.
މާލެ ސިޓީ މޭޔަރު ކަމަށް ވެސް ކުރިމަތިލައްވާފައިވާ ޑރ. މުޢިއްޒު ވިދާޅުވީ މިއީ ސަރުކާރުން އަންގައިގެން ކުރަމުންދާ ކަމެއް ކަމަށާއި ބޭނުމަކީ ކެންޕެއިނަށް ހުރަސް އެޅުން ކަމަށެވެ.
"އަޅުގަނޑު ކެންޕެއިނަށް ސަރުކާރުން ހުރަސްއެޅުމަށް، އަސްލެއް ނެތް ދޮގު ވާހަކަތައް ފެތުރުމަށް، އަބުރު ކަތިލުމަށް ސަރުކާރުން އަންގައިގެން 23 މާޗްގައި އޭސީސީއަށް ހާޒިރުކުރާނެ، ފުރިހަަމައަށް ޖަވާބުދާރީ ވާނަން" ޑރ. މުޢިއްޒު ވިދާޅުވިއެވެ.
ޑރ. މުޢިއްޒު އޭސީސީއަށް ހާޒިރު ކުރަނީ ކޮން މައްސަކައަކާ ގުޅިގެން ކަމެއް އެނގިފައެއް ނުވެއެވެ.
މީގެ ކުރީން ޕީޖީން ވަނީ ، ދޮގު ބަޔާނެއް ދިން ކަމުގެ ދައުވާއެއް ވެސް ޑރ. މުޢިއްޒުގެ މައްޗަށް އުފުލާފައެވެ.
އެގޮތުން ޕްރޮސެކިއުޓާ ޖެނެރަލްގެ އޮފީހުން ބުނީ ޖޫން 25، 2019 ގައި ނޫމަޑި ރިސޯޓްސް އެންޑް ރެސިޑެންސަން އޭޖީ (ނޫމަޑި) ނަމަކަށް ކިޔާ ކުންފުންޏަކުން ދިވެހި ސަރުކާރާ ދެކޮޅަށް، ނެދަލެންޑްސްގެ ދަ ހޭގްގައި ހުންނަ ޕާމަނަންޓް ކޯޓް އޮފް އާބިޓްރޭޝަނަށް ހުށައަޅާފައިވާ މައްސަލައިގައި ކުންފުނީގެ ހެކިވެރިއަކަށްވެ، ހައުސިން ޔުނިޓް މަޝްރޫ އާއި ގުޅިގެން ނޫމަޑިއާއެކު ދިވެހި ސަރުކާރުން 2011 ގައި ވެފައިވާ ފޭސް އެކެއްގެ އެއްބަސްވުމާއި 2013 ގައި ވެފައިވާ ފޭސް ދޭއްގެ އެއްބަސްވުމުގެ މަސައްކަތް އެ ކުންފުނިން ޝެޑިއުލްއާ އެއްގޮތަށް ލަސްތަކެއް ނުވެ ކުރަމުންދިޔަ ކަމަށް ބުނެ، އަދި ނޫމަޑިއަށް ލަގްޒަރީ ވިލާ އެޅުމަށް ދިވެހި ސަރުކާރުން ދޫކޮށްފައިވާ ޅ. ދިއްފުށިމާދޫ، ސަރުކާރުގެ ބޭނުމަށް ނެގުމުގެ މަޝްވަރާގައި ބައިވެރިވެފައި ނުވާނެ ކަމަށް ބުނެ ދޮގު ބަޔާނެއް ދީފައިވާތީ ޑރ. މުއިއްޒުގެ މައްޗަށް ދޮގު ބަޔާން ދިނުމުގެ ކުށުގެ ދައުވާ އުފުލަން ކްރިމިނަލް ކޯޓަށް ފޮނުވާފައިވާ ކަމަށެވެ.
އެ މައްސަލަ ޕީޖީ އޮފީހުން ފޮނުވީ ޖޫން 14، 2020 ގައެވެ. ނަމަވެސް ޑރ. މުޢިއްޒު ވަނީ އެތުހުމަތުތައް ދޮގު ކުރައްވާފައެވެ. މުއިއްޒުގެ މައްޗަށް ގިނަ މައްސަލަތަކެއް އުފުލާފައި މިވަނީ އިންތިޚާބަށް ނުފޫޒު ފޯރުވުމަށް ކަމަށް އިދިކޮޅުން ތުހުމަތު ކުރެއެވެ.
