އިބްރާ ރައީސް ނަޝީދަށް: އެމްޑީޕީ އުފައްދަން ޤުރުބާންވީ ޕާޓީގެ އަސާސަކީ ރައްޔިތުންގެ ޙައްޤުކަމަށް ކަނޑައަޅައިގެން!

އެމްޑީޕީގެ އަސާސަކީ މާލޭ މީހުން ގެދޮރުވެރި ކުރުވުން ކަމަށް ކުރީގެ ރައީސް މުޙައްމަދު ނަޝީދު ވިދާޅުވުމުން، އެމްޑީޕީގެ ފުރަތަމަ ރައީސް އިބްރާހިމް އިސްމާއިލް (އިބްރާ) ރައްދު ދެއްވައިފިއެވެ.

Ads by Sosun Fihaara

މާފަންނު އެމްޑީޕީ ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ނަޝީދު ވިދާޅުވީ އެމްޑީޕީ އެންމެ ފުރަތަމަ އުފެދިގެން އައި އަސާސްއަކީ މާލެ ސަރަހައްދުގެ ރައްޔިތުން ގެދޮރުވެރިކޮށް ދިނުން ކަމަށެވެ.

"މާލޭގެ ރައްޔިތުންނަށާއި، މާލެ ސަރަހައްދުގައި ދިރިއުޅޭ ރައްޔިތުންނަށް ގެދޮރުވެރިކަން ހޯދައިދިނުމުގެ މަސައްކަތަކީ ދިވެި ރައްޔިތުންގެ ޑިމޮކްރަޓިކް ޕާޓީ އުފެދިގެން އައި ހަގީގީ އަސާސް" ރައީސް ނަޝީދު ވިދާޅުވިއެވެ.

އެވާހަކަފުޅަށް ރައްދު ދެއްވަމުން އިބްރާ ވިދާޅުވީ އެމްޑީޕީ އުފެއްދުމަށް އެމަނިކުފާނު ޤުރުބާންވީ ޕާޓީގެ އަސާސަކީ ރައްޔިތުންގެ ހައްޤާއި، އަދުލުވެރިކަމާއި، ހަމަހަމަކަން އޮތްކަމަށް ކަނޑައަޅައިގެން ކަމަށެވެ.

"އަހަރެން އެމްޑީޕީ އުފައްދަން ޤުރުބާންވީ ޕާޓީގެ އަސާސަކީ ރައްޔިތުންގެ ހައްޤާއި، އަދުލުވެރިކަމާއި،ހަމަހަމަކަން އޮތްކަމަށް ކަނޑައަޅައިގެން. ޕާޓީ އުފައްދަން މަގޭއަތުން ލިޔުނު އަސާސީ ޤަވާއިދުގައި އޮންނާނީ އެހެން." އިބްރާ ވިދާޅުވިއެވެ.

އެ އަސާސް ބަދަލުވެ، މާލެ މީހުން ގެދޮރުވެރި ކުރުވުން ކަމަށް ބަދަލުވީ ކޮންއިރަކުތޯ ވެސް އިބްރާ ސުވާލު ކުރެއްވިއެވެ. އަދި އެމްޑީޕީގެ އަސާސަކީ އެވަގުތަކު އެޕާޓީގެ ރައީސްކަމުގައި ހުންނަ މީހަކު ޕޯޑިއަމްގައި ބުނާ އެއްޗެއްތޯވެސް އިބުރާ ވަނީ ސުވާލު ކުރައްވާފައެވެ.