މަގުމަތީގައި ކުނި ހުންނަ މައްސަލަ ހައްލު ކުރުމުގެ ބާރު އަދިވެސް އޮތީ އީޕީއޭގެ އަތުގައި : ޝިފާ
މަގުމަތީގައި ކުނި ބަހައްޓާ މީހުން ޖޫރިމަނާ ކުރުމުގެ ބާރު އޮތީ އެންވަޔަރަމަންޓު މިނިސްޓްރީގެ ދަށުން އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ)އަށް ކަމަށް މާލެ ސިޓީގެ މޭޔަރު ޝިފާ މުޙައްމަދު ވިދުވެއްޖެއެވެ.
ޝިފާ ކުރެއްވި ޓުވީޓެއްގައި ވިދާޅުވީ މަގު މަތީގައި ކުނި ބަހައްޓާ މީހުން ޖޫރިމަނާ ކުރުމުގެ ބާރު އޮތީ އެންވަޔަރަމަންޓު މިނިސްޓްރީގެ ދަށުން އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ)އަށް ކަމަށާއި ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)އާއި ފުލުހުން ގުޅިގެން މަސައްކަތް ކުރެވޭނެ ގޮތެއް ހޯދުމަށް އެދިވަަޑައިގެންފައިވާނެ ކަމަށެވެ.
އަދި ހުޅުމާލެއާއި ވިލިމާލެ އަދި މާލޭގެ ވެށި ސާފުކޮށް ބެހެއްޓުން މުހިއްމުކަމަށް ޝިފާ ވިދާޅުވިއެވެ.
މީގެ އިތުރުން ޝިފާގެ ޓްވީޓްގައި ވިދާޅުވީ ޤަވާޢިދާ ޚިލާފަށް ކުނި އަޅާ ފަރާތްތަކުގެ އެގޮތަށް ކުނި ނަގަން ޖެހުމުން ރައްޔިތުންގެ ފައިސާގެ ބޮޑު ބައެއް ބޭކާރުވާ ކަމަށެވެ.
ކުނީގެ މައްސަލައަކީ މާލެއަށް ދިމާވެފައިވާ ބޮޑު ގޮންޖެހުމެކެވެ. މާލޭގެ މަގުމަތީގެ އެކި ދިމާލުގައި ކުނި އެއްކޮށްފައި ހުންނަ މަންޒަރު މިހާރު ފެންނަމުން ދެއެވެ.
