ނިއު ޔޯކުން ވެސް އިންޑިއާގެ ކެއުންތައް ލިބޭނެ ގޮތް ޕްރިޔާންކާ ހަދައިދީފި
ބޮލީވުޑް އަދި ހޮލީވުޑް ގައި ވެސް ފިޔަޖަހަމުން އަންނަ މަޝްހޫރު ތަރި ޕްރިޔާންކާ ޗޯޕްރާ ޖޯނަސް، އެމެރިކާގެ ނިއު ޔޯކްގައި ރެސްޓޯރަންޓެއް ހުޅުވައިފިއެވެ.
އިންޑިއާގެ ކެއުންތައް ލިބޭނެ ގޮތަށް ހުޅުވި މި ރެސްޓޯރަންޓަށް ދީފައިވާ ނަމަކީ "ސޯނާ" އެވެ. ޕްރިޔާންކާ ބުނި ގޮތުގައި އެ ރެސްޓޯރަންޓަށް ނަން ދިނީ އޭނަގެ ފިރިމީހާ ނިކް ޖޯނަސް އެވެ.
ރަސްމީކޮށް އިއްޔެ އެ ރެސްޓޯރަންޓު ހުޅުވާފައިވާއިރު، ރެސްޓޯރަންޓު ހުޅުވުމުގެ ރަސްމިއްޔާތަށް ޕްރިޔާންކާ އަކަށް ނުދެވުނެވެ. އޭނާ ބުނީ ޝޫޓިންގަކަށް ދާން ޖެހޭތީ ރެސްޓޯރަންޓު ހުޅުވުމުގެ ރަސްމިއްޔާތަށް ނުދެވުނު ނަމަވެސް، އޭނާގެ ހިތް ވީ އެތަނުގައި ކަމަށެވެ.
ރެސްޓޯރަންޓް ހުޅުވުމަށް އެހީތެރިވެދިން އެންމެންނަށް ޕްރިޔާންކާ ޝުކުރު އަދާކުރަމުން އޭނާ ބުނީ، ވިޔަފާރީގެ މައިދާނަށް މިއީ އޭނާ ނުކުންނަ ފުރަތަމަ ފަހަރު ކަމަށެވެ.
ނިއުޔޯކް ގައި "ސޯނާ" ހުޅުވާފައިވާއިރު، ޕްރިޔާންކާ މިއަދު ވަނީ ބޮލީވުޑުގައި އޭނާ އެންމެ ފަހުން ކުޅުނު ފިލްމާ ބެހޭ ގޮތުން ވެސް ވާހަކަ ދައްކާފައެވެ. އެގޮތުން އޭނާ ބުނީ، ބޮލީވުޑްގައި އޭނާ އެންމެ ފަހުން ކުޅުނު ފިލްމު ރިލީޒް ވާނީ އަންނަ އަހަރު ކަމަށެވެ.
