ހަތަރު ހާހެއްހާ ކޮވިޑް ސާމްޕަލް ޓެސްޓު ނުކުރެވި އެބަހުރި: ނަސީމް
ވަރަށް ގިނަ ބައެއްގެ ސުންކު ކޮވިޑަށް ޓެސްޓް ކުރުމަށް ނަގައިފައިވާ ކަމަށާއި އޭގެ ތެރެއިން 3،000 ނުވަތަ 4،000 ސާމްޕަލް އަދި ހުރީ ޓެސްޓް ނުކުރެވި ކަމަށް ހެލްތް މިނިސްޓަރު އަހުމަދު ނަސީމް ވިދާޅުވެއްޖެއެވެ.
ރައްޔިތުންގެ މަަޖިލީހުގެ މިއަދުގެ ޖަަލްސާގައި ވަޒީރުންނާ ސުވާލު ކުރުމުގެ ވަގުތުގައި މެމްބަރަކު ކުރެއްވި ސުވާލަަކަށް ޖަވާބު ދެއްވަމުން ނަސީމް ވިދާޅުވީ، ނުނިމި ހުރި ސުންކުތައް ގިނަަވެގެން އުޅެނީ ޓެސްޓް ކުރަން ޖެހޭ މީހުންގެ އަދަދު މާ ގިނަވުމާއި އެކަން ކުރުމުގެ ގާބިލުކަން އެ ވަރަށް ނެތުމުން ކަމަށެވެ. އަދި ކުރިއަށް އޮތް ދެ ދުވަހެއްގެ ތެރޭގައި ސުންކުތައް ޓެސްޓްކޮށް ނިންމައިލެވޭނެ ކަމަށް ލަފާ ކުރެވޭ ކަމަށް ވެސް ނަސީމް ވިދާޅުވިއެވެ.
"އިރާދަކުރެއްވިއްޔާ ދެ ދުވަހެއްގެ ތެރޭގައި އަޅުގަނޑުމެނަށް ސޮލިއުޝަނެއް ލިބޭނެ. އެ ކަންތައްތައް ސާފުވީމާ ދެން އަޅުގަނޑުމެންނަށް ކުރިއަށް ދެވޭނީ،" ނަސީމް ވިދާޅުވި އެވެ.
ނަސީމު ވިދާޅުވީ ޓެސްޓު ކުރުމަށް ބޭނުންވާ އިތުރު ވަސީލަތްތަކެއް އަންނަ އޭޕްރީލު މަހުގެ ތެރޭގައި ލިބޭނެ ކަމަށާއި އެ ވަސީލަތްތައް ލިބުމުން މިހާރު ހުރި ދަތިތަކަށް ލުޔެއް ލިބޭނެ ކަމަށެވެ.
މީގެ އިތުރުން މިހާރު ޓެސްޓު ނުކުރެވި ހުރި ސުންކުތައް ޓެސްޓުކޮށް ނިންމައި، އަވަހަށް ނަތީޖާ ފޯރުކޮށްދިނުމާ ގުޅޭ ގޮތުން ރޭގައި ބައްދަލުވުމެއް ބާއްވައިފައިވާ ކަމަށް ވެސް ނަސީމް ވިދާޅުވިއެވެ.
ކޮވިޑަށް ޓެސްޓު ކުރުމަށް ސުންކު ނަގައި ނަތީޖާ ނުލިބި އެތައް ދުވަހެއް އިންތިޒާރު ކުރަން ޖެހުމަކީ ވަކިވަކި ފަރުދުން އަދި މުޖުތަމަޢު ނަފްސާނީ ހާސްކަމުން ބަލިކަށިކޮށްލާ ކަމެއް ކަމަށާއި އެއީ ރަށުގެ ޙަޤީގީ ޙާލަތު ދެނެގަތުމަށް އޮތް ވަރަށް ބޮޑު ގޮންޖެހުމެއް ކަމަށް ވިދާޅުވެ ނައިފަރު ދާއިރާގެ މެންބަރު އަހުމަދު ޝިޔާމް ވަނީ ކަންބޮޑުވުން ފާޅު ކުރައްވާފައެވެ.
