ފަންނީ ދާއިރާގެ ފަރާތްތަކަށް ދީފައިވާ ފްލެޓްތައް އަތުލަން ހަސަން ލަތީފް ގޮވާލައިފި
ހިޔާ މަޝްރޫޢުގެ ދަށުން ފަންނީ ފަރާތްތަކަށް ދީފައިވާ ފުލެޓުތައް އަތުލަން ޖެހޭ ކަމަށް ހެންވޭރު ހުޅަނގު ދާއިރާގެ މެންބަރު ހަަސަން ލަތީފް ވިދާޅުވެއްޖެއެވެ.
ސަރުކާރުގެ ބޯހިޔާވަހިކަމުގެ ސިޔާސަތާއި ބޯހިޔާވަހި ކަމުގެ މަޝްރޫޢާ ގުޅޭ ގޮތުން ޤައުމީ ތަރައްޤީއާއި ތަރިކައިގެ ކޮމިޓީން ނިންމި ގޮތުގެ ބަހުސްގައި ވާހަަކަފުޅު ދައްކަވަމުން ހަސަން ލަތީފް ވިދާޅުވީ، އިޖުތިމާޢީ ގެދޮރުވެރިކަމުގެ މަޝްރޫޢެއްގައި އެންމެ މުހިއްމު ސިފައަކީ މީހާގެ ދިރިއުޅުމުގެ ފެންވަރު ވަޒަން ކުރުމަށް ފަހު އެ މީހެއްގެ ދިރިއުޅުމުގެ ފެންވަރަށް އެކަށީގެންވާ ގޮތެއްގައި ގެދޮރުވެރިކަން ފޯރު ކޮށްދިނުން ކަމަށެވެ. ނަމަވެސް ހިޔާ މަޝްރޫޢުގެ ބައެއް ކެޓެގެރީތަކުގައި ދިރިއުޅުމުގެ ހާލަތަށް ނުބައްލަވާ ކަމަށް ވެސް ހަސަން ލަތީފް ވިދާޅުވިއެވެ.
"ބައެއް ކެޓެގަރީތަކުން ހުރީ ދިރިއުޅުމުގެ ހާލަތަށް ނުބެލި އެ ކެޓެގަރީތަކުން ބޯހިޔާވަހިކަން ފޯރު ކޮށްދީފަ. ޚާއްސަކޮށް ފަންނީ ކެޓެގަރީގެ މީހުން" ހަސަން ލަތީފް ވިދާޅުވިއެވެ.
ހަސަން ހަތީފް ވިދާޅުވީ، ފަންނީ ކެޓެގަރީގެ މީހުންނަށް ލިބިފައިވާ ފްލެޓްތައް އެފަރާތްތަކުގެ އަތުން އަތުލައި، އެބޭފުޅުންނަށް އެހެން ފުރުސަތެއް ކުރިޔަށް އޮތް މަޝްރޫޢުއަކުން ލިބޭނެ އިންތިޒާމެއް ހަމަޖެއްސަން ޖެހޭ ކަމަށެވެ. އަދި މިގޮތަށް ނަގާ ފްލެޓްތައް މާލޭގައި ދިރިއުޅުގެ ހާލަތު އިންތިހާއަށް ދެރަ، ނިކަމެތިންނަށް ފްލެޓް ލިބޭނެ ގޮތެއް ހޯދައިދޭން ޖެހޭ ކަމަށް ޙަސަން ލަތީފް ވިދާޅުވިއެވެ.
ޙަސަން ލަތީފް ވިދާޅުވީ ހިޔާ ފްލެޓްގެ މަޝްރޫޢުއަކީ ސޯޝަލް ހައުސިންގް ޕްރޮޖެކްޓަކަށް ވާއިރު، ފްލެޓް ލިބެން ޖެހޭނީ އެކަމަށް އެންމެ އެކަށީގެންވާ މީހުންގެ ދިރިއުޅުމުގެ ހާލަތު ބަލާފައި އެމީހުންނަށް ކަމަށެވެ.
