ވެކްސިންގެ ދެވަނަ ޑޯޒް ހޮނިހިރު ދުވަހު ޖަހަން ފަށަނީ
ކޮވިޑް-19 އިން ރައްކާތެރިވުމަށް ދޭ ، އެސްޓްރަޒެނެކާ ކޮވިޝީލްޑް ވެކްސިންގެ ދެވަނަ ޑޯޒް، އޭޕްރިލް ތިންވަނަ ދުވަހު ދޭން ފަށާނެ ކަމަށް ހެލްތު އެމަޖެންސީ އޮޕަރޭޝަން ސެންޓަރުން ބުނެފިއެވެ.
ކޮވިޑް-19 އާ ދެކޮޅަށް އުފެއްދި ވެކްސިން ރާއްޖޭގައި ދޭން ފެށީ މިދިޔަ ފެބްރުއަރީ މަހުގެ އެއްވަނަ ދުވަހުއެވެ. ވެކްސިން ދޭން ފެށިތާ މިވީ ދެ މަސްތެރޭގައި މިހައިތަނަށް ދެ ލައްކަ އަށް ވުރެ ގިނަ މީހުންނަށް ވެކްސިންގެ ފުރަތަމަ ޑޯޒް ވަނީ ދީފައެވެ.
އަންނަ ހޮނިހިރު ދުވަހުން ފެށިގެން ދާނެ ވެކްސިންގެ ދެވަނަ ޑޯޒް ދިނުމުގެ ޕްރޮގްރާމަށް ވެކްސިންގެ އިތުރު އެއްލައްކަ ޑޯޒް އިއްޔެ ރާއްޖެ ގެނެސްފައި ވެއެވެ. މާލޭގައި ހުންނަ އަށް ސެންޓަރުންނާއި އަތޮޅުތަކުގެ 169 ސެންޓަރެއްގައި ވެކްސިން ދިނުމުގެ މަސައްކަތް އަންނަނީ ކުރަމުންނެވެ.
ރާއްޖޭގައި އަމަލު ކުރަމުން އަންނަ އުސޫލުގެ ދަށުން ކޮވިޝީލްޑް ވެކްސިންގެ ފުރަތަމަ ޑޯޒް ޖަހާތާ އަށް ހަފްތާ ފަހުން ދެ ވަނަ ޑޯޒް ދޭނެއެވެ. އަދި ސިނޮފާމް ވެކްސިންގެ ފުރަތަމަ ޑޯޒް ޖަހާތާ ދެ ހަފްތާ ފަހުން ދެ ވަނަ ޑޯޒް ދޭނެއެވެ.
މިހާތަނަށް ރާއްޖޭގެ އާބާދީގެ 47 އިންސައްތަ މީހުނަށް ވަނީ ވެކްސިން ދީފައެވެ. ވެކްސިން ޖަހާފައިވާ ޖުމުލަ 235،682 މީހުންގެ ތެރެއިން މާލެ ސަރަހައްދުން ވެކްސިން ޖަހައިފައި ވަނީ 130،376 މީހުންނެވެ. އަދި އަތޮޅުތަކުން 105،306 މީހުން ވަނީ ވެކްސިން ޖަހައިފައެވެ.
Ads by STO
