ކައިވެނި ކޮށްގެން އުޅޭކަން ގިނަ މީހުންނަށް ނޭނގުނަސް، ކްރިތީ ފިރިމީހާއާ ވަކިވެއްޖެ
ބޮލީވުޑްގެ އެކްޓްރެސް ކްރިތީ ކުލާރީ، އޭނަގެ ފިރިމީހާ ސާހިލްއާ ވަކިވެއްޖެކަން އިއުލާނު ކޮށްފިއެވެ.
ކްރިތީ ބުނީ އޭނާއާއި ސާހިލްގެ ކައިވެނި ރަސްމީކޮށް އަދި ރޫޅާނުލި ކަމުގައި ވިޔަސް، މިހާރު ދެ މީހުން ވެސް އެކަކު އަނެކަކުގެ ދިރިއުޅުމުގައި ނެތް ކަމަށެވެ.
މީސްމީޑިއާ މެދުވެރިކޮށް ކްރިތީ މި ފަދައިން ހާމަ ކުރަމުން ބުނީ ސާހިލް އާއި އޭނަގެ ކައިވެނި ރޫޅާލައި ވަކިވާން ދެ މީހުން ވެސް ނިންމާފައިވާ ކަމަށާއި އެހެން ނަމަވެސް އެކަން އަދި ކަރުދާހުން ނިންމާފައި ނުވާ ކަމަށެވެ.
"ފިރިމީހާއާ ވަކިވާން ނިންމިޔަސް، މީހަކާއެކު ނޫޅުމުގެ އިހުސާސަކީ އަދި އެކަނިވެރިކަމުގެ އިހުސާސަކީ ވަރަށް ހިތާމަވެރި އިހުސާސެއް. މިއީ ފަސޭހަކަމެއް ވެސް ނޫން. އެކަމަކު ވާން ހުރި ކަމެއް ވާނެ" އިތުރަށް އެކަމާ ވާހަކަ ދައްކަން ބޭނުން ނުވާ ކަމަށް ބުނެ ކްރިތީ ބުންޏެވެ.
މީގެ އިތުރުން ވެސް ކްރިތީ ބުނެފައި ވަނީ އޭނާގެ ހާލަތާމެދު ހަމްދަރުދީވާ އެންމެންނަށް ޝުކުރު އަދާ ކުރާ ކަމަށާއި އޭނާ ހުރީ ހިތްވަރު ގަދަކޮށް ކަމަށެވެ.
ކްރިތީ މީގެ ކުރިން ދީފައިވާ އިންޓަވިއު އެއްގައި ބުނެފައި ވަނީ، އޭނާއަކީ "ބޮޑު ސްޓާރަކަށް" ނުވުމުން އޭނާ އުޅެނީ ކައިވެނި ކޮށްގެންކަން ގިނަ ބަޔަކަށް ނޭނގުނު ކަމުގައި ވިޔަސް ފިލްމު "ޕިންކް" ކުޅުމުގެ ހަތަރު މަސް ކުރިން އޭނާ ކައިވެނި ކުރި ކަމަށެވެ.
