ގިނަ ފިލްމުތަކެއްގައި މަންމައެއްގެ ރޯލު ކުޅެފައިވާ ކިރަން ޚޭރަށް ކެންސަރު ޖެހިއްޖެ
އިންޑިއާގެ ގިނަ ފިލްމުތަކެއްގައި މަންމައެއްގެ ރޯލު ކުޅެފައިވާ ކިރަން ޚޭރަށް ކެންސަރު ޖެހިއްޖެއެވެ.
ބޮލީވުޑްގެ އެކްޓަރ އަނޫޕަމް ޚޭރްގެ އަނބިމީހާ ކިރަންއަށް ޖެހިފައި ވަނީ ލޭގެ ކެންސަރު ކަމަށް ރިޕޯޓުތަކުން ބުނެއެވެ. ކިރަންއަށް ކެންސަރު ޖެހިފައިވާކަން ހާމަ ކޮށްފައި ވަނީ އަނޫޕަމް ކަމަށް ވެސް ރިޕޯޓުތަކުން ބުނެއެވެ.
ކާމިޔާބު ފިލްމުތައް ކަމަށްވާ "ދޭވްދާސް"، "ހަމް ތުމް"، "އޯމް ޝާންތީ އޯމް" ފަދަ ފިލްމުތަކުގައި މަންމައެއްގެ ރޯލު އަދާ ކޮށްފައިވާ ކިރަންގެ ތަފާތު އަދި މަޖާ އެކްޓިންގެ ސަބަބުން އޭނާއަށް ވަރަށް ގިނަ މީހުން ސަޕޯޓު ކުރެއެވެ.
ކިރަންއަށް ކެންސަރު ޖެހިފައިވާ ކަމުގެ ޚަބަރާއެކު ބޮލީވުޑްގެ އެތައް ބަޔަކާއި އޭނާގެ ފޭނުން ވެސް ވަނީ އަވަސް ޝިފާއެއް ލިބުމަށް އެދި ކިރަންއަށް ހެޔޮ ދުޢާ ކޮށްފައެވެ.
އަނޫޕަމް ބުނީ، ނުރައްކާތެރި ބައްޔެއް ޖެހިފައިވީ ނަމަވެސް ކިރަންގެ ހިތްވަރަށް ބަދަލެއް ނާންނަ ކަމަށެވެ. އަދި ކިރަންއަށް ފަރުވާ ދޭން ވަރަށް އަވަހަށް ފަށާނެ ކަމަށް ވެސް އަނޫޕަމް ބުންޏެވެ.
