ގައިދުރުކޮށްގެން ޖަމާއަތުގައި ނަމާދު ކުރުން ނިމުމަކަށް ގެނެސްފި
ކޮވިޑް-19 ގެ ބަލިމަޑުކަމާ ގުޅިގެން، މި ހާލަތުގައި ގައިދުރުކޮށް ސަފު ހަދައިގެން ނަމާދުކުރަން ނިންމި ނިންމުން ބާތިލްކޮށް، ގައިދުރުކޮށް ސަފު ހެދުން ނިމުމަކަށް ގެނެސްފިއެވެ.
ކޮވިޑް-19 ބަލި ފެތުރުން ކޮންޓްރޯލް ކުރުމަށް ގައިދުރުކަމާއެކީ މާލޭ ސަރަހައްދުގެ މިސްކިތްތަކުގައި ޖަމާއަތް ހެދުމަށް އަންގާފައިވަނީ މާޗު މަހުގެ 1 ވަނަ ދުވަހުއެވެ.
އިސްލާމިކް މިނިސްޓަރު ޑރ. އަހުމަދު ޒާހިރު އަލީ މިއަދު ކުރެއްވި ޓުވީޓެއްގައި ވިދާޅުވީ މިއަދުގެ މަޣްރިބް ނަމާދުން ފެށިގެން މިސްކިތްތަކުގައި ގައިދުރުކޮށް ސަފުހެދުން ނިމުމަކަށް ގެނެވިފައިވާ ކަމަށެވެ.
ގައިދުރުކޮށް ނަމާދުކުރަން އެންގި އެންގުމުގައި އިސްލާމިކް މިނިސްޓްރީން ބުނީ އެގޮތަށް ނިންމާފައި ވަނީ މިސްކިތުގެ ޖަމާއަތް މެދުކަނޑާލައި މިސްކިތް ބަންދު ކުރުމަކީ ރައްޔިތުންނަށް ލިބޭނެ ވަރަށް ބޮޑު ހިތްދަތި ކަމަކަށް ވުމާއި، މިހާލަތުން އަރައިގަތުމަށް ކުރެވެން އޮތްކަމަކީ މިސްކިތް ބަންދު ކުރުމުގެ ބަދަލުގައި ގައި ދުރުކަމާއެކު ނަމާދުގެ ޖަމާއަތް، ހެދުން ކަމުގައި ފަތުވާ މަޖިލީހާއި ބައެއް އިލްމުވެރިން ލަފާ ދެއްވާފައިވާތީ ކަމަށެވެ.
އިސްލާމިކް މިނިސްޓްރީންނާއި ފަތުވާ މަޖިލީހުން މިގޮތަށް ނިންމައި އަމަލު ކުރި ނަމަވެސް ބައެއް ދީނީ އިލްމުވެރިންގެ ޚިޔާލު މިކަމާ ތަފާތެވެ.
