ޑައުންޕޭމަންޓު ނުދައްކާ ވެސް ހިޔާ ފްލެޓްތަކަށް ވަދެވޭނެ، އަގަކީ މަހަކު 7500 ރުފިޔާ
ޑައުންޕޭމަންޓު ނުދައްކާ ވެސް ހިޔާ ފްލެޓުތަކަށް ވަދެވޭނެ ކަމަށާއި ޑައުންޕޭމަންޓް ނުދައްކާ ނަމަ ހިޔާ ފްލެޓްތަކަށް މަހަކަށް ދައްކަން ޖެހޭނީ 7500 ރުފިޔާ ކަމަށް ހައުސިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި އަސްލަމް ވިދާޅުވީ ހިޔާ ފްލެޓަށް ޑައުންޕޭމަންޓް ނުދައްކާ، 25 އަހަރަށް ކުލި ބަހާލާނެ ފުރުސަތު ވެސް ލިބޭނެ ކަމަށާއި އެ އޮޕްޝަންގެ ދަށުން މަހަކަށް ޖެހޭނީ 7500 ރުފިޔާ ކަމަށެވެ.
"ޑައުންޕޭމެންޓެއް ދައްކައިގެން ކުރިއަށް ވަަޑައިގަންނަވަން ބޭނުން ފަރާތްތަކަށް ދެ އޮޕްޝަނެއް ދިނުމަށް ސަރުކާރުގެ ވިސްނުން ހުރީ. މިނިސްޓްރީ އޮފް ފިނޭންސާއި އެޗްޑީސީއާއެކު ސަރުކާރުން މަސައްކަތް ކުރޭ އެ ދެ އޮޕްޝަނަކީ ކޮބައިތޯ. ޑައުންޕޭމެންޓެއް ދައްކައިފިއްޔާ 7،500އަށް ވުރެ ކުޑަވާނެ، އެހެންވީމާ އެންމެ ބޮޑުވަރުވެގެން ދައްކަން ޖެހޭނީ 7،500 ރުފިޔާ. އެއީ ޑައުންޕޭމެންޓެއް ނުދައްކާ. ޑައުންޕޭމެންޓެއް ދެއްކީމަ މަހެއްގެ މައްޗަށް ދައްކަން ޖެހޭ މިންވަރު ކުޑަވާނެ. ޑައުންޕޭމެންޓު ދައްކާ މިންވަރަކުން ކުޑަވާ މިންވަރު އަންނާނީ،" މިނިސްޓަރު ވިދާޅުވިއެވެ.
އަސްލަމް ވިދާޅުވީ 7500 ރުފިޔާއަކީ ހިޔާ ފްލެޓަށް ދައްކަން ޖެހޭ އެންމެ ބޮޑު ކުލި ކަމަށެވެ. އަދި ހިޔާ ފްލެޓުގެ އަސްލު އަގާ އަޅާބަލާއިރު، މިއީ ކުޑަ އަގެއް ކަމަށް ވެސް ވިދާޅުވިއެވެ.
މިނިސްޓަރު އަސްލަމް ވިދާޅުވީ ފްލެޓުތަކުގެ ގުރުއަތު ނެގުމަށް ފަހު، ފްލެޓު ލިބޭ މީހުންނާއެކު އެޗްޑީސީން އެއްބަސްވުން އެކުލަވާލާނެ ކަމަށާއި އޭގެ ފަހުން އެ ތަންތަނަށް ވަނުމަށް ކުރަންޖެހޭ ކަންތައް ކުރަން ތިން މަސް ދޭނެ ކަމަށެވެ.
Ads by STO
