މި ކަންތައްތަކުގެ ސަބަބުން ޒުވާން އުމުރުގައި އިއްދައިން ކެނޑިދާނެ: ދިރާސާ
އިއްދައިން ކެނޑުމަކީ އަންހެނެއްގެ ރަޙިމުގައި ބިސް އުފެދުން ހުއްޓުމެވެ. އޭގެ ސަބަބުން މަހުން މަހަށް ޖެހެމުން އަންނަ މައްސަރު ކަންތައް ޖެހުން ހުއްޓި، ދަރިމައިވުން ވެސް ހުއްޓެއެވެ.
އާންމު ގޮތެއްގައި އަންހެނުން އިއްދައިން ކެނޑެނީ އުމުރުން 55 އަހަރުވުމަށް ފަހުއެވެ. ނަމަވެސް ބައެއް ހާލަތްތަކުގައި އެއަށްވުރެ އަވަހަަށް ވެސް އަންހެނުން އިއްދައިން ކެނޑިދާނެ ކަމަށް ސައިންސްވެރިން ބުނެފައި ވެއެވެ.
ސިއްޙީ ބައެއް މާހިރުން ބުނާ ގޮތުގައި، މި ކަންތައްތަކުގެ ސަބަބުން އަންހެނަކު ޒުވާން އުމުރުގައި (އުމުރުން 45 އަހަރުވުމުގެ ކުރިން) ވެސް އިއްދައިން ކެނޑިދާނެއެވެ.
އެކަންތައްތަކަކީ:
▪︎ދުންފަތުގެ އިސްތިއުމާލު ކުރުން
ތިމާއަކީ ގިނައިން ވިޔަސް ނުވަތަ މަދުން ވިޔަސް، ދުންފަތުގެ އިސްތިއުމާލު ކުރާ މީހެއްނަމަ، ދުންފަތުގައި ހިމެނޭ ޓޮކްސިންގެ ސަބަބުން ތިމާގެ ރީޕްރޮޑަކްޓިވް ސިސްޓަމަށާއި ހޯމޯންސްއަށް ވެސް އަސަރު ކުރާނެކަމަށް ކަމާ ބެހޭ މާހިރުން ބުނެފައި ވެއެވެ. ދުންފަތުގެ އިސްތިއުމާލު ކުރާ އަންހެނުން އަވަހަށް އިއްދައިން ކެނޑެނީ މިހެންވެ ކަމަށް ވެސް އެ ބޭފުޅުން ބުނެއެވެ.
▪︎ރާބުއިން
މިއީ ރާއްޖޭގައި އާންމުކަމެއް ނޫން ކަމުގައި ވިޔަސް، ސިއްރިއްޔާތުގައި ވެސް ނުވަތަ ބޭރު ޤައުމުތަކަށް ގޮސްފައި ވެސް މި ޙަރާމް ކަންތައް ކުރާ ދިވެހިން އުޅެއެވެ. މި ކަމަކީ މުސްލިމު ނޫން އަންހެނަކު ކުރިކަމުގައި ވިޔަސް، ޒުވާން އުމުރުގައި އިއްދައިން ކެނޑެން މެދުވެރިވާ އެއްކަންތަކެވެ. ސައިންޓިސްޓުން ކޮށްފައިވާ ދިރާސާތަކުގައި ބުނެފައި ވަނީ ރާބޯ މީހަކު ހަށިގަނޑަށް ފައިދާ ހުރި ވިޓަމިންސް އާއި މިނެރަލްސް އަދި އެ ނޫން ވެސް ކާނާ ކާން ނޫޅޭނެ ކަމަށާއި އެކަމުގެ ސަބަބުން އިއްދައިން ކެނޑޭ އުމުރު އަވަސްވާ ކަމަށެވެ.
▪︎ ބަރުދަން މާ ބޮޑަށް އިތުރުވުން
ބަރުދަން މާބޮޑަށް އިތުރުވެފައިވާ ނަމަ ހަށިގަނޑުގައި އެސްޓްރޮޖެން ހުންނަވަރު މަދުވެއެވެ. އެހެންކަމުން ޒުވާން އުމުރުގައި އިއްދައިން ކެނޑެއެވެ.
▪︎ މާބޮޑަށް ފިކުރު ކުރުން
ސިއްހަތާ ބެހޭ މާހިރުން ބުނެފައިވާ ގޮތުގައި ޖިސްމާނީ ގޮތުން ލިބޭ އަނިޔާގެ ސަބަބުން ވެސް މައްސަރުކަންތަކަށް އަސަރު ކުރެއެވެ. އަދި ނަފްސާނީ ގޮތުން ލިބޭ އަނިޔާ ނުވަތަ ފިކުރު ބޮޑުވެ މާބޮޑަށް ހިތާމަ ކުރުމުން، ޤަވާއިދުން މައްސަރު ކަންތައް ޖެހުމަށް ދަތިވެއެވެ. އެކަމުގެ ސަބަބުން ވެސް އަވަހަށް އިއްދައިން ކެނޑެއެވެ.
މަސްދަރު: ވިމެންސް ހެލްތު
