ހަތަރު މޭޔަރުންނާއެކު އެމްޑީޕީން 1000 ގޮނޑި ނަގާނެ : ރައީސް ނަޝީދު
ކުރިއަށް އޮތް ލޯކަލް ކައުންސިލް އިންތިހާބުގައި އެމްޑީޕީން 1000 ގޮނޑި ކާމިޔާބު ކުރާނެ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ރަށްވެހި ފަތިސް ކެމްޕެއިނުގައި އއ. ރަސްދޫ ފަޅުތެރޭގައި މިރޭ ބާއްވާ "ރަށްވެހި ފަތިސް އަލިވިލުން" ޖަލްސާގައި ބައިވެރިވެވަޑައިގަތުމަށް ފުރައިވަޑައިގަތުގެ ކުރިން، ހުޅުމާލޭ ބަނދަރު ސަރަހައްދުގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ އެމްޑީޕީން ވާދަކުރާ ގޮނޑިތަކުގެ ތެރޭގައި ފާހަގަ ކޮށްލެވޭ ބައެއް ގޮނޑިތައް އެބަހުރި ކަމަށާއި އޭގެ ތެރެއިން ވެސް މޭޔަރުންގެ ގޮނޑިއަކީ ފާހަގަކޮށްލެވޭ ގޮނޑިއެއް ކަމަށެވެ.
އެގޮތުން އައްޑޫ އިން ފެށިގެން އައިސް ކުޅުދުއްފުއްޓާ ފުވައްމުލަކާއި މާލެ، މި ހަތަރު ސިޓީގެ މޭޔަރުކަން ފަސޭހަކަމާއެކު ނަގާނެ ކަމަށް ރައީސް ނަޝީދު ވިދާޅުވިއެވެ.
އަދި އެމްޑީޕީއަކީ އަބަދުވެސް ޖެހިލުމެއް ނެތި، ކޮންމެ އިންތިހާބަކާ ވެސް ކުރިމަތިލާ ޕާޓީއެއް ކަމަށާއި އެއްވެސް އިންތިހާބެއް އުނދަގޫވާނެ ކަމުގެ ވިސްނުން އެމްޑީޕީން ނުގެންގުޅޭ ކަމަށް ރައީސް ނަޝީދު ވިދާޅުވިއެވެ.
"އިރާދަކުރެއްވިއްޔާ މި ކައުންސިލް އިންތިހާބުގެ ގިނަ ގޮނޑި މި ޕާޓީން ކާމިޔާބުކުރާނެ. އަޅުގަނޑުމެން އެބަ ކުރިމަތިލަން ފަނަރަ ސަތޭކައެއްހާ ގޮނޑިއަށް، އަޅުގަނޑަށް ޔަގީން އޭގެ ތެރެއިން ހާހެއްހާ ގޮނޑި އަޅުގަނޑުމެން ނަގާނެ،" ރައީސް ނަޝީދު ވިދާޅުވިއެވެ.
ރައީސް ނަޝީދު އިތުރަށް ވިދާޅުވީ އެމްޑީޕީ އަކީ ސަނާ ކިޔާ އަޑާއި ޕާޓީގެ ވެރިންނަށް ހުޝާމަދުކުރާ އަޑު އަހާ ހިތްވާ ޕާޓީއެއް ނޫން ކަމަށާއި، އެމްޑީޕީއަކީ ޝަކުވާ އަޑުއަހާ ޕާޓީއެއް ކަމަށެވެ.
Ads by STO
