ފިރިހެން ދަރިފުޅު އިންނަން އުޅުނީ އަމިއްލަ ދަރިއަކާ ކަން އެނގުނީ ކައިވެނި ހަފްލާގައި

ލޯބިން އެކުގައި އުޅުނު ދެ ލޯބި ވެރިންނެވެ. ވަކި ނުވުމަށް ވައުދު ތަކާއި އަހުދުތައް ވީ އެކަކު އަނެކަކު ދެކެ އިންތިހާއަށް ލޯބިވާތީއެވެ. ނަމަވެސް ތަގުދީރުގައި ތިމާއަށް ޓަކައި ލިޔެވިފައިވާ އެއްޗެއް އެނގޭނީ ފަހެ ކާކަށް ހެއްޔެވެ؟

Ads by Hajj Corporation

.ޗައިނާގެ އަވަށަކަށް ނިސްބަތްވާ މި ދެ ލޯބިވެރިން ވެސް އެމީހުންގެ އަމިއްލަ ދުނިޔޭގައި ދުވަސްތައް ގުނަމުން ދިޔައީ އަންނަން އޮތް ކޮޅިގަނޑުގެ ހިލަމެއް ނުވެ ތިބެއެވެ. ކައިވެނީގެ ގުޅުމުން ގުޅެ، އެ ގުޅުން ފުރިހަމަކުރަން ތައްޔާރު ވަމުން ދިޔައީ އެއްވެސް ނުތަނަވަސްކަމެއް ނެތިއެވެ. ހިޔާލެއް ފިކުރެއް ނެތިއެވެ.
ނަމަވެސް ކޮޅިގަނޑުގެ ވައިގަދަވީ ކުއްލި އަކަށެވެ. އެއްވެސް އިންޒާރެއް ނެތި އެވެ. ލޯބިން އެކުގައި މި އުޅެވުނީ އެއްބަނޑު އެއްބަފާ ދައްތައާ ކަން އެނގުނީ ކައިވެނީގެ ހަފްލާގައެވެ.

ކައިވެނީގެ ކުރިން ފިރިހެން ދަރިފުޅު އިންނަން އުޅޭ ކުއްޖާ ރަނގަޅަށް ނޭނގުމަކީ މަންމަ އަށް ކުރެވުނު ކުށެއްބާ އެެވެ. ނޫނީ އެއީ އެކަންވާން އޮތް އެންމެ ރަނގަޅު ގޮތް ބާވައެވެ.
ކައިވެނީގެ ހަފްލާގައި ފިރިހެން ކުއްޖާގެ މަންމައަށް ދަރިފުޅު އިންނަން އުޅޭ އަންހެން ކުއްޖާގެ އަތުގައި އިން އުފަން ލައް ފެނުން އެއީ ކާކުގެ ނަސީބެއް ކަމެއް ނޭނގެއެވެ.

ކޮންމެއަކަސް އެ އުފަން ލައް ފެނުމާ އެކު އަންހެން މީހާގެ ހިތުގައި ޝައްކު އުފެދުނެވެ. ގިނަ އަހަރު ތަކަކަށް އޭނާ ގެއްލިގެން ހޯދި އަންހެން ދަރިފުޅަށް މި ކުއްޖާ ވެދާނެ ބާއޭ ހިތަށް އެރިއެވެ. އޭނާގެ އަންހެން ދަރިފުޅުގެ އަތުގައި އިން އުފަން ލައް ފިރިހެން ދަރިފުޅު އިންނަން އުޅޭ އަންހެން ކުއްޖާގެ އަތުގައި ވެސް އިނުމުން ހިތުގައި އުފެދުނު ޝައްކު ޔަޤީން ކުރުމަށް އަންހެން ކުއްޖާގެ މައިންބަފައިންނާ ފިރިހެން ކުއްޖާގެ މަންމަ ބައްދަލު ކުރިއެވެ.

އެގޮތުން އެ އަންހެން ކުއްޖާ އަކީ މިގެ ވިހި އަހަރު ކުރިން އެމީހުން އެޑޮޕްޓް ކުރި ކުއްޖެއްތޯ އަންހެން މީހާ ސުވާލު ކުރިއެވެ. އޭނާގެ މި ސުވާލާ އެކު އަންހެން ކުއްޖާގެ މައިންބަފައިން މޫނުމަތިން ހައިރާންކަން ފާޅުވިއެވެ. އެމީހުންގެ ބޮޑު ސިއްރު ފިރިހެން ކުއްޖާގެ މަންމަ އަށް އެނގުނު ގޮތާ މެދު ސުވާލު އުފެދުނެވެ. ނަމަވެސް އެމީހުން ހަޤީޤަތް ހާމަ ކުރިއެވެ. އެއީ ވިހި އަހަރު ކުރިން އެމީހުން މަގުމަތިން ހޯދި އަންހެން ކުއްޖެއް ކަމުގައި ބުންޏެވެ.

ގިނަ އަހަރު ތަކަކަށް ފަހު އަމިއްލަ ދަރިފުޅާ ބައްދަލުވިއިރު ހާލަތް ނިކަން ދެކެބަލާށެވެ. އަންހެން ކުއްޖާއަށް ވެސް އޭނާގެ އުފަން މަންމަ އާއި ދިމާވި އިރު ކަންތައްތައް ވެފައި މިވަނީ ހީވެސް ނުކުރާ ފަދަ ގޮތަކަށެވެ. އޭނާ އަށް ކައިވެނި ކުރެވެން މި އުޅެވުނީ އެއްބަނޑު އެއްބަފާ ބޭބެއާ ހެއްޔެވެ. ނުވަތަ ކޮއްކޮ ހެއްޔެވެ.
ނަމަވެސް އުއްމީދީ ހުޅުކޮޅު ދިއްލިގެން ދިޔައީ ފިރިހެން ކުއްޖާގެ މަންމަ ހާމަކުރި ހަޤީޤަތުންނެވެ. އޭނާ ބުނި ގޮތުގައި އެ ފިރިހެން ކުއްޖާ އަކީ އޭނާގެ އުފަން ދަރިއެއް ނޫން ކަމަށެވެ. އަދި އެއީ އޭނާގެ އަންހެން ދަރިފުޅު ހޯދުމަށްޓަކައި އަހަރުތަކަކަށް މަސައްކަތް ކޮށްގެން ވެސް އެ ދަރިފުޅު ނުފެނުމުން އެޑޮޕްޓް ކުރި ކުއްޖެއް ކަމުގައި ބުންޏެވެ. އެހެންކަމުން ފިރިހެން ކުއްޖާ އާއި އަންހެން ކުއްޖާ ކައިވެނި ކުރުމަކުން މައްސަލައެއް ނެތެވެ.

އެ ކައިވެނި ކުރެވުނެވެ. ގެއްލިފައިވާ ގުޅުންތަކެއް ބަދަހި ވީއެވެ. ނަމަވެސް މިއީ އެންމެ ހާދިސާ އެކެވެ. މިފަދަ ކިތަންމެ ހާދިސާއެއް ވެސް ހިނގާފައިވާނެ ކަން ޔަގީނެވެ.

އާއިލާ ތަކުގެ ތެރޭގައި މިފަދަ ވާހަކަތައް ސިއްރުގެ ގޮތުގައި ނުބާއްވަންވީ ސަބަބުތަކަކީ މިއީ އެވެ. ކޮންމެ މީހަކަށްވެސް އެމީހެއްގެ އާއިލާ އާއި ހަސަބާއި ނަސަބު ރަނގަޅަށް އެނގި ސާފުވުން މުހިއްމެވެ. އެހެން ނޫނީ މި ފަދަ ހާދިސާތައް ނުހުއްޓުވޭނެއެވެ.