އިސްލާމިކް މިނިސްޓްރީ އުތެމަ އާއިމެދު އެޅި ފިޔަވަޅަކީ "ނަސޭޙަތް"
އިސްލާމް ދީނާއި ޚިލާފު ވާހަކަތަކެއް ހިމަނައިގެން "އުތެމަ" ޖަމިއްޔާއިން ނެރުނު ރިޕޯޓާއި ގުޅިގެން އެޖިއްޔާއަށް "ނަސޭޙަތް" ދީފައިވާނެކަމަށް އިސްލާމިކް މިނިސްޓަރ ޑރ. އަހުމަދު ޒާހިރު ވިދާޅުވެއްޖެއެވެ.
ޑރ. ޒާހިރު ވިދާޅުވީ އުތެމަ އިން ނެރުނު ރިޕޯޓުގައި އިސްލާމް ދީނަށް ފުށު އަރާ ބައެއް ވާހަކަތައް ހުރި ކަމަށް ފާހަގަ ކުރެވުމުން އެ ކަން އިސްލާހު ކުރަން އެ ޖަމިއްޔާއަށް ނަސޭހަތް ދީފައިވާ ކަމަށާއި އެ ޖަމިއްޔާއިން އެ ކަން އިސްލާހު ކޮށްފައިވާ ކަމަށެވެ.
ވީޓީވީގެ ޕްރޮގްރާމެއްގައި ބައިވެރިވެވަޑައިގެން މިކަމާއި ގުޅޭގޮތުން އިސްލާމިކް މިނިސްޓަރު ވިދާޅުވީ، ދީނާ ފުށު އަރާ ވާހަކަތަކެއް ދެކެވިފައިވާ ކަން މިނިސްޓްރީއަށް ފާހަގަ ކުރެވުމުން، އެއީ ކޮންމެ ފަރާތަކަށް ވިޔަސް ފުރަތަމަ އަމަލު ކުރާ އުސޫލަކީ އެ ފަރާތްތަކަށް ނަސޭހަތްދީ އެ ކަމެއް އިސްލާހު ކުރަން އެންގުން ކަމަށެވެ.
"އިސްލާމް ދީނަށް ފުށުއަރާ ފަދަ ވާހަކަތަކެއް ދައްކައިފިނަމަ އެއީ މިނިސްޓްރީގެ ޒިންމާއެއް، އެ ބޭފުޅުންނާ ވާހަކަ ދައްކައިގެން އެ ބޭފުޅުންނަށް ނަސޭހަތްދީ ކިޔައިދީ އެ ހުރި ކަންތައް އިސްލާހު ކޮށް ދިނުން. އިސްލާމް ދީނަށް ފުށުއަރާ އެއްވެސް ކަމެއް ފެނިއްޖެނަމަ އަޅުގަނޑުމެން ހަމަ އެ މޭރުމުން ކަންތައް ކުރާނީ." ޑރ. ޒާހިރު ވިދާޅުވެފައިވެއެވެ.
އިސްލާމިކް މިނިސްޓަރ ވިދާޅުވީ އުތެމަ ޖަމިއްޔާއިން ނެރުނު ރިޕޯޓާއި ގުޅިގެން ވެސް، އެޖަމިއްޔާގެ ބޭފުޅުންނާއި ބައްދަލުކޮށް ނަސޭޙަތް ދީފައިވާނެ ކަމަށާއި މިނިސްޓްރީގެ ފަރާތުން އެ ކަންބޮޑުވުންތައް ފާހަގަ ކޮށްދިނުމުން އެ ޖަމިއްޔާއިން އެ ކަން އިސްލާހު ކޮށްފައިވާ ކަމަށެވެ.
