ރަމަޟާންމަހަށް މަރުޙަބާ ކިޔުމުގެ ގޮތުން އިދިކޮޅުގެ ފަރާތުން މިރޭ ޚާއްސަ މާހެފުމެއް
ބަރަކާތްތެރި ރަމަޟާން މަހަށް މަރުޙަބާ ކިޔުމުގެ ގޮތުންނާއި އިއްޔެ ކުރިއަށް ދިޔަ ލޯކަލް ކައުންސިލުތަކުގެ އިންތިހާބުގައި އިދިކޮޅު ޕީޕީއެމް،ޕީއެންސީއަށް ލިބުނު ކާމިޔާބީ ފާހަގަ ކުރުމުގެ ގޮތުން، މިރޭ ވަރަށް ޚާއްސަ މާހެފުމެއް ބޭއްވުމަށް އެ ކޯލިޝަނުން ނިންމައިފިއެވެ.
ޕީޕީއެމުން ބުނީ އެ ހަފްލާ އޮންނާނީ މިރޭ 8:30ގައި ޕީޕީއެމް އޮފީސް ދޮރުމަތީގައި ކަމަށެވެ.
މިއަދު ކުރިއަށް ދިޔަ ޕީޕީއެމް،ޕީއެންސީގެ ޕްރެސްގައި އެ ކޯލިޝަންގެ އެކްޓިން ލީޑަރު ޢަބްދުއްރަޙީމް ޢަބްދުﷲ (އަދުރޭ) ވަނީ މި މާހެފުމަށް ހުރިހައި އެންމެންނަށް ދައުވަތު އަރުވާފައެވެ.
"ޕީޕީއެމްއަށް ތާއީދު ކުރައްވާ ރައީސް ޔާމީނަށް ތާއީދު ކުރައްވާ ޤައުމު ދެކެ ލޯބިވާ ހުރިހާ ބޭފުޅުން މިރޭ މި މާހެފުމުގައި ބައިވެރި ވަޑައިގަތުމަށް އަޅުގަނޑު ދައުވަތު އަރުވަން" އަދުރޭ ވިދާޅުވިއެވެ.
އިއްޔެ ބޭއްވި ލޯކަލް ކައުންސިލު އިންތިހާބުގައި ޕީޕީއެމްގެ ކެނޑިޑޭޓުންނަށް، އަދި ވަކިން ޚާއްސަކޮށް މާލެސިޓީ ކައުންސިލުގެ މޭޔަރު ކަމަށް ހޮވިވަޑައިގަތް ޑރ. މުޙައްމަދު މުޢިއްޒުއަށް ވޯޓު ދެއްވި ހުރިހާ ފަރާތްތަކަށް އަދުރޭ ވަނީ ޝުކުރު އަދާ ކުރައްވާފައެވެ.
