މިފަހަރު ކާމިޔާބު ނުވިޔަސް ރައްޔިތުންނަށް ޚިދުމަތް ކުރާނެ ފުރުސަތު ހޯދާނަން: ލަތީފް
އިއްޔެ ބޭއްވި ލޯކަލް ކައުންސިލު އިންތިހާބުން ކާމިޔާބު ނުވި ކަމުގައި ވިޔަސް، އައްޑޫގެ ރައްޔިތުންނަށް ޚިދުމަތް ކުރާނެ ފުރުސަތު ހޯއްދަވާނެ ކަމަށް އައްޑޫސިޓީގެ މޭޔަރު ކަމަށް ވާދަ ކުރެއްވި ޕީޕީއެމްގެ ކެނޑިޑޭޓް މުޙައްމަދު ލަތީފު ވިދާޅުވެއްޖެއެވެ.
ލަތީފް މިއަދު ކުރެއްވި ޓްވީޓެއްގައި، އައްޑޫ ބަހުން ވިދާޅުވެފައި ވަނީ އައްޑޫ މޭޔަރު ކަމަށް ކުރިމަތިލުމަކީ އައްޑޫ ރައްޔިތެއްގެ ހައިސިއްޔަތުން އެމަނިކުފާނަށް ލިބިލެއްވި ފަޚުރެއް ކަމަށެވެ.
"މިފަހަރު ކާމިޔާބު ނުވިޔަސް އައްޑޫ ރައްޔިތުންނަށް ޚިދުމަތް ކުރާނެ ފުރުސަތު އިރާދަކުރެއްވިއްޔާ އަޅުގަނޑު ހޯދާނަން. އަޅުގަނޑަށް ވޯޓުދިން ރައްޔިތުން މާޔޫސްވާނެ ޖާގައެއް ނުދޭނަން" ލަތީފް ވިދާޅުވިއެވެ.
އައްޑޫސިޓީގެ މޭޔަރުކަމަށް ކުރިމަތިލައްވާފައިވަނީ ޕީޕީއެމްގެ ފަރާތުން ލަތީފްގެ އިތުރުން އެމްޑީޕީގެ ފަރާތުން އަލީ ނިޒާރުއާއި އަމިއްލަ ގޮތުން ބައިވެރިވެލެއްވި ކެންޑިޑޭޓް އިބްރާހިމް ޠާހިރްއެވެ.
އިންތިހާބުގެ ނަތީޖާ ދައްކާފައިވާގޮތުން 1783 ވޯޓާއެކު ކުރި ހޯދައިފައި ވަނީ ޢަލީ ނިޒާރެވެ.
ލަތީފަށް ލިބިވަޑައިގެންފައިވަނީ 1180 ވޯޓެވެ. އެއީ ވޯޓުލީ މީހުންގެ 39.11 އިންސައްތަ ވޯޓެވެ.
އަމިއްލަ ގޮތުން ވާދަ ކުރެއްވި ޠާހިރަށް ލިބިވަޑައިގެންފައިވަނީ 77 ވޯޓެވެ.
