ނާކާމިޔާބުވީ ކޮވިޑް-19ގެ ފިޔަވަޅުތަކުންނާއި ރައްޔިތުންނަށް ބޯހިޔާވަހިކަން ނުދެވުމުން: ރައީސް ޞާލިހު
ކައުންސިލް އިންތިހާބުގައި އެމްޑީޕީއަށް ނާކާމިޔާބުވީ ރައްޔިތުންނަށް ބޯހިޔާވަހިކަން ފޯރުކޮށް ނުދެވުމުންނާއި ކޮވިޑް-19 ގެ ސަބަބުން އަޅާފައިވާ ފިޔަވަޅުތަކުގެ ސަބަބުން ކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި ލޯކަލް ކައުންސިލް އިންތިހާބުގައި މާލެ ސިޓީން އެމްޑީޕީއަށް ނާކާމިޔާބުވީ ކީއްވެތޯ ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ޞާލިހު ވިދާޅުވީ އެކަން އެގޮތަށް ދިމާވި ބައެއް ސަބަބުތައް ފާހަގަ ވެފައިވާ ކަމަށެވެ.
އެގޮތުން މާލޭގެ ރައްޔިތުންނަށް ކުރިމަތިވެފައިވާ ބޯހިޔާވަހިިކަމުގެ މައްސަލައަށް ހައްލު ހޯދައިދޭން ޖެހޭކަން ރައީސް ފާހަގަކުރެއްވިއެވެ.
"މާލެއަށް އައި ބަދަލާ ދޭތެރޭގައި ޖެހޭ ވިސްނަން. ކަންބޮޑުވުން ހުރިކަން ފާހަގަ ވެއްޖެ. މާލެ ސިޓީއާއި ހުރިހާ ރަށްތަކަށް ކަންބޮޑުވުންތަކާއި އިހުސާސްތައް ދެނެގަނެ އެކަން ހާސިލް ކުރުމުގައި ދެމި އޮންނާނެ." ރައީސް ޞާލިހު ވިދާޅުވިއެވެ.
ރައީސް އިތުރަށް ވިދާޅުވީ ކޮވިޑް-19 އާ ގުޅިގެން އެޅި ހަރުކަށި ފިޔަވަޅުތަކުގެ ސަބަބުން ވެސް މާލެ ރައްޔިތުންނަށް ވަރަށް ބޮޑަށް އަސަރު ކުރި ކަމަށާއި އެއީ ވެސް ސަބަބެއް ކަމަށެވެ. އެގޮތުން ޓެކްސީ ދުއްވާ ބޭފުޅުންނާއި ރެސްޓޯރެންޓުތަކުގެ ވެރިންނާއި ވިޔަފާރިވެރިންނަށް ގެއްލުންވި ކަމަށް ރައީސް ފާހަގަ ކުރެއްވިއެވެ.
މީގެ އިތުރުން ވައްކަމާއި ކޮރަޕްޝަންގެ މައްސަލަތައް އެންމެ އެކަށީގެންވާ ގޮތަށް ނުބެލޭކަން ފާހަގަ ކުރައްވައި އޭގެ ތެރޭގައި އެމްއެމްޕީއާރުސީގެ މައްސަލައާއި، ގެއްލިފައިވާ މީހުންނާއި މަރާލެވިފައިވާ މީހުންގެ މައްސަލަތައް ރައީސް ފާހަގަ ކުރެއްވިއެވެ.
ދެން ކޮބާ ކުރިހާ ވައްކަންތައް؟ ހަމަ ކޮވިޑޭ ކިޔައިގެން ދެން ބޯނުކެވޭނެ.