ރަސްމީ ދަތުރުފުޅެއްގައި މިނިސްޓަރ ޝާހިދު އިންޑިއާއަށް
ރަސްމީ ދަތުރުފުޅެއްގައި މިނިސްޓަރ އޮފް ފޮރިން އެފެއާޒް އަބްދުﷲ ޝާހިދު އިންޑިއާއަށް ފުރައިވަޑައިގެންފިއެވެ.
ފޮރިން މިނިސްޓްރީން ބުނީ މި ދަތުރުގައި އިންޑިއާގެ މިނިސްޓާ އޮފް އެކްސްޓާނަލް އެފެއާޒް ޑރ. އެސް ޖައިޝަންކަރް އާއި ބައްދަލު ކުރައްވައި ބައިލޭޓަރަލް އަދި މަލްޓިލޭޓަރަލް ކަންކަމާ ބެހޭ ގޮތުން މަޝްވަރާ ކުރައްވާނެ ކަމަށެވެ.
މި ދަތުރުފުޅަކީ ދެ ޤައުމުގެ ގުޅުން އިތުރަށް ބަދަހިކޮށް، އިންޑިއާ ސަރުކާރުގެ އެހީގައި ދިވެހިރާއްޖޭގައި ކުރިއަށްގެންދާ މަޝްރޫޢުތަކާ ގުޅޭގޮތުން މަޝްވަރާ ކުރެއްވުމަށް ކުރައްވާ ދަތުރުފުޅެއްކަމަށް ފޮރިން މިނިސްޓްރީން ވިދާޅުވެއެވެ.
އިންޑިއާއިން ރާއްޖެއަށް އެކި ގޮތް ގޮތަށް އެހީވަމުން ދާއިރު މިނިސްޓަރު ޝާހިދު މީގެ ކުރިން ވިދާޅުވެފައި ވަނީ ސަރަހައްދުގެ ތަރައްގީއާއި ކުރިއެރުމާއި އަދި ސުލްހައާއި ރައްކާތެރިކަމުގެ އިތުރުން، ސަރަހައްދުގެ ގައުމުތައް ގުޅިގެން ކުރާ މަސައްކަތުގައި އިންޑިއާ މުހިއްމު ދައުރެއް އަދާކުރައްވާ ކަމަށެވެ.
އެގޮތުން ކޯވިޑް19ގެ ޙާލަތާ ގުޅިގެން ބޭހާ ވެކްސިން ފޯރުކޮށްދިނުމާ، އަދި ރާއްޖޭގައި ގިނަ މަޝްރޫޢުތަކެއް ކުރިއަށް ގެންދިއުމުގައި އެހީތެރިކަން ދިނުމާ ގުޅޭ އެއްބަސްވުންތަކުގައި ވެސް ދެ ޤައުމުގެ ދެމެދުގައި ވަނީ ސޮއި ކޮށްފައެވެ.
