އެމްޑީޕީގެ ދަތުރުފަތުރު ކުރުމުގެ ސިޔާސަތު ރަނގަޅު: ޝިޔާމް
މިއަދު ސަރުކާރު ހިންގަން އޮތް މޯލްޑިވްސް ޑިމޮކްރެޓިކް ޕާޓީ (އެމްޑީޕީ)އިން ރިޔާސީ އިންތިޚާބުގައި ގެންގުޅުނު ދަތުރުފަތުރުގެ ސިޔާސަތަކީ ރަނގަޅު ސިޔާސަތެއް ކަމަށް ނައިފަރު ދާއިރާގެ މެންބަރު އަޙްމަދު ޝިޔާމް ވިދާޅުވެއްޖެއެވެ.
ޓްރާންސްޕޯޓް އޮތޯރިޓީ އުވާލަން މަޖިލީހަށް ހުށަހަޅާފައިވާތީ ރޯޑް ސޭފްޓީ ކައުންސިލްގައި އެ އޮތޯރިޓީން ކަނޑައަޅާ ފަރާތެއް އިންނަ އިނުން ވެސް އިސްލާހު ކުރަން ހުށަހެޅި ބިލަށް ބަހުސް ކުރައްވަމުން ޝިޔާމް ވިދާޅުވީ ޓްރާންސްޕޯޓް އޮތޯރިޓީ އުވާލުމުން ދިވެހި ރާއްޖޭގައި ޓްރާންސްޕޯޓާ ގުޅުންހުރި މައްސަލަތައް ހައްލު ނުވާކަމަށް ވިދާޅުވިއެވެ. އަދި އެމްޑީޕީގެ ސިޔާސަތު ރަނގަޅު ކަމަށާއި ވެގެން އުޅޭ ގޮތަކީ ސިޔާސަތު ތަންފީޒް ކުރަން ނޭނގުން ކަމަށްވެސް ޝިޔާމްގެ ވާހަކަފުޅުގައި ފާހަގަ ކުރެއްވިއެވެ،
"ދަތުރުފަތުރު ހަރުދަނާ ކުރުމަށްޓަކައި އެމްޑީޕީއިން ނެރެފައި އޮތީ ރަނގަޅު ސިޔާސަތެއް. އެހެން ނަމަވެސް ސަރުކާރު އެކުލެވިގެން އެސިޔާސަތުތައް ތަންފީޒް ކުރަންވީމަ އަޅުގަނޑުމެންނަށް މި ފެންނަނީ އެ ސިޔާސަތުތައް ނޭނގޭ ބަޔަކު، ތަންފީޒް ކުރަން ތިބި ތަން." ޝިޔާމް ވިދާޅުވިއެވެ.
ޝިޔާމް އިތުރަށް ވިދާޅުވެފައި ވަނީ މިއަދު ސަރުކާރުގެ އެންމެ މަތީވެރިޔާއިން ފެށިގެން ގޮސް ސަރުކާރުގެ އެންމެ ދަށުގައި މަސައްކަތް ކުރާ މީހާއާ ހަމައަށް ފެއިލްވެފައިވާ ކަމަށެވެ، ރައްޔިތުން ލޯކަލް ކައުންސިލްގައި ދިން ވޯޓުން މިކަން ސާފުވެއްޖެ ކަމަށްވެސް ޝިޔާމް ވިދާޅުވިއެވެ. ޝިޔާމް ވިދާޅުވީ، ކަމެއް ރަނގަޅު ކުރުމުގެ ނިޔަތް އޮތްނަމަ ވަގުތު ފާއިތުވުމުގެ ކުރިން ކަންތައްް ރަނގަޅު ކުރަން އުޅޭނެ ކަމަށާއި ރައްޔިތުން އެމްޑީޕީއަށް މެޖޯރިޓީ ދިނީ މިފަދަ ޒިންމާތަކާ އެކުގައި ކަމަށެވެ.
"ރައްޔިތުންނަކަށް މިތަނަކަށް ނުވަދެވޭނެ ނާޤާބިލް ވަޒީރުން ވަކި ކުރާކަށް، ނާޤާބިލު މެނޭޖިން ޑިރެކްޓަރުން ވަކި ކުރާކަށް. ރައްޔިތުން މެންޑޭޓެއް ހަވާލުކޮށްފަ، ރައްޔިތުން މި ހުރިހާ ކަމެއް ހަވާލުކޮށްފައި މިތިއްބެވީ މިތާންގައި ތިބި 65 މެންބަރުންނަށް." ޝިޔާމް ވިދާޅުވީ ވަޒީރަކު ގޯސްކޮށް ކަމެއް ކުރުމުން އެމީހަކު ވީހާވެސް އަވަހަށް ވަކި ކުރަން އެމްޑީޕީގެ މެޖޯރިޓީއަށް އެނގެން ޖެހޭ ކަމަށެވެ.
ސަރުކާރުގެ ތެރެއިން ކުރަންޖެހޭ ބައެއް ކަންކަން ނުވެ ރައްޔިތުންގެ ފާޑުކިޔުންތަކުގެ ދިފާއުގައި އެ ޕާޓީގެ ބައެއް މެންބަރުން އެންމެ ގިނައިން ވިދާޅު ވަނީ މިއަދު މިއޮތް ސަރުކާރަކީ އެމްޑީޕީގެ ސަރުކާރެއް ނޫން ކަމަށް ވިދާޅުވާ ވިދާޅުވުމަށް ވެސް ޝިޔާމް މިއަދުގެ ޖަލްސާގައި ވަނީ ރައްދު ދެއްވާފައެވެ. މިގޮތުން ވިދާޅުވީ، ރާއްޖޭގެ ރައްޔިތުން ވޯޓް ދިނީ އެމްޑީޕީއަށް ކަމަށާއި އެހެންކަމުން މިއަދު ރާއްޖޭގައި މިއޮތީ އެމްޑީޕީގެ ސަރުކާރެއް ކަމަށެވެ.
"އަޅުގަނޑުމެންނަށް މިއަދު ޓީވީތަކަށް އަރާފައި ނުބުނެވޭނެ މިއީ އެމްޑީޕީގެ ވެރިކަމެއް ނޫނެކޭ. މިއީ އެމްޑީޕީގެ ވެރިކަމެއް. އެމްޑީޕީއަށް ރައްޔިތުން ވޯޓް ދިނީ." ޝިޔާމް ވިދާޅުވިއެވެ.
