ރޯދައަށް ރަށަށް ނުދެވުން، ހިތް ނުތަނަވަސް ކުރުވާ ހިތާމަވެރި އިހްސާސެއް
އުފަން ރަށަށް ދެވުމަކީ އަބަދުވެސް ތަފާތު އިހްސާސެއް ކުރުވާ ކަމެކެވެ. ކުޑައިރުގެ ހުރިހާ ހަނދާންތަކެއް ގުޅި ލާމެހިފައި ވަނީ އެ ފަސްގަނޑާއެވެ. އާއިލާގެ ބޮޑު ބައެއް ދިރިއުޅެނީ އެ ފަސްގަނޑުގައެވެ. އަމިއްލަ ގެދޮރާއި ތަކެތި ވެސް ހުރީ އެ ފަސްގަނޑުގައެވެ. އެއްބައިވަންތަ އެންމެންނާ ގުޅޭ ރައްޔިތުންތަކެއް އުޅެނީ ހަމަ އެ ފަސްގަނޑުގައެވެ.
މުޅި ދުނިޔެއަށް ކުރިމަތިވެފައި މިވާ ކޮވިޑް-19ގެ އާލަމީ ވަބާގެ ސަބަބުން އަހަރެމެންނަށް އަމިއްލަ ފަސްގަނޑަށް ނުދެވޭތާ އެތައް ދުވަހެއް ވެއްޖެއެވެ. މާލޭގައި ރަށު ބަންދުގައި ތިބޭތާ މިހާރު އަހަރަކަށް ވުރެ ގިނަވެ ދެ އަހަރުވުމާ ގާތް ވަނީއެވެ. އަދިވެސް ބަލި ޖެހޭ މީހުންގެ އަދަދު ކޮންޓްރޯލެއް ނުވެއެވެ. ރަށު ބަންދު ފިލާނެ އިރެއްގެ އިންތިޒާރުގައި ތިބި ރައްޔިތުންނަށް ލިބެނީ އިތުރު މާޔޫސް ކަމެކެވެ.
މިދިޔަ އަހަރުގެ އަޟްހާ އީދަށް ރަށްރަށަށް ދެވޭނެ ކަމަށް އަހަރެމެން އުއްމީދު ކުރީމެވެ. އީދުގައި ރަށަށް ގޮސް މަޖާ ނަގައި ސަކަރާތް ޖަހާ ހަދާށެވެ. އެހެން ނަމަވެސް އެ ފަހަރު ވެސް ހިތް މަރާލީ އެއީ ވެސް ކުރެވުނު ކުށްހީއެއް ކަން އެނގުމުންނެވެ. ދެން އިންތިޒާރު ކުރީ އައު އަހަރު ފެށޭ ދުވަހަށެވެ. 2021އަށް އިރު އުދަރެހުން ދައްކާލާނީ މާލޭގެ ރަށު ބަންދުން މިންޖު ވެގެން ކަމުގައި ހިތް ބުނި ނަމަވެސް އެއީ ވެސް ހިތުގައި އުފެދުނު ވަހުތާނެކެވެ.
1442ވަނަ އަހަރުގެ ރަަމަޟާން މަހަށް ވެސް ރަށު ބަންދުން ސަލާމަތްވެ ރަށަށް ދެވޭނެ ކަމަށް އެތައް ބަޔަކު އުއްމީދު ކުރިއެވެ. އެހެން ނަމަވެސް ކަންވީ އެހެނެއް ނޫނެވެ. އަހަރެމެން އަދިވެސް މި ތިބީ މާލޭގައި ބަންދުވެފައެވެ. ރޯދަ މަހުގައި ރަށުގައި ޖަހާ ސަކަރާތާއި އާއިލާއާއެކު ހޭދަ ކުރާ ވަގުތުތައް ހަނދާންވުމުން ހިތަށް ކުރަނީ ބުނެދޭން ނޭނގޭ ފަދަ އިހްސާސެކެވެ. ހަމަ ގައިމުވެސް ރަށުގައި ރޯދަ މަސް ދާ ހެން މާލޭގައި ރޯދަ މަހެއް ނުދާނެއެވެ.
