ހިދާޔަތް: މާތް ﷲ މިއުޒިކް ޙަރާމް ކުރެއްވިއެވެ. އެކަން ޙަލާލް ނުކުރާށެވެ.
މިއުޒިކް ޙަރާމް ހެއްޔެވެ؟ މިއީ އަޅުގަނޑުމެންގެ މުޖުތަމަޢުގައި ދޭތެރެ ދޭތެރެއިން ވަރަށް ގިނައިން ދެކެވޭ ވާހަކައެކެވެ. ކުރެވޭ ބަހުޘެކެވެ. އިސްލާމްދީނުގައި މިޔުޒިކާ ބެހޭގޮތުން މީހުންގެ މެދުގައި ވާހަކަ ބަދަލު ކުރެވި، އޭގެ ޙުކުމާ ބެހޭ ގޮތުން ބައެއް އިޚްތިލާފްވެ، އެކަންކަމާމެދު މެދު ޝައްކު އުފެދޭ ގޮތަށް ވާހަކަތައް ވަރަށް ގިނައިން ދެކެވިގެންދެއެވެ.
މި ރަމަޟާން މަހު "ދެން" އިން ޚާއްސަކޮށްގެން ގެނެސްދޭ "ހިދާޔަތު" ޕްރޮގްރާމުގައި ދީނީ ޢިލްމުވެރިޔާ އައްޝައިޚް ޒަމްޒަމް ފާރިޝް ވަނީ، އިސްލާމްދީނުގައި މިޔުޒިކްގެ ޙުކުމާ ބެހޭ ގޮތުން ވާހަކަފުޅު ދައްކަވާފައެވެ.
ޝައިޚް ޒަމްޒަމް ފާރިޝް ވިދާޅުވީ މިއުޒިކްގެ ޙުކުމް ވަރަށް ސާފު ކަމަށެވެ. އެއީ ޙަރާމް ކަމެއް ކަމަށެވެ. މިގޮތުން މިއުޒިކްގެ ޙުކުމަކީ ޙަރާމްކަން ރަސޫލާ (ޞޢވ) ގެ ހަދީޘް ބަސްފުޅުންނާއި ޞަޙާބީންގެ ތަފްސީރުން އެނގެން އޮންނަ ކަމަށްވެސް ޝައިޚް ފާރިޝް ވިދާޅުވިއެވެ.
"ﷲ ތަޢާލާ، ކީރިތި ޤުރްއާނުގައި ލުގްމާން ސޫރަތުގެ 6 ވަނަ އާޔަތުގައި ވަޙީ ކުރައްވައިފައިވާ ބަސްފުޅުގެ މާނައިގައި، އިބްނު މަސްއޫދު ރަޟިއަﷲ ތަޢާލާ އަންޙު ވިދާޅުވެފައި ވަނީ ﷲ ގަންދީ ހުވައޭ އެއީ މިޔުޒިކެވެ. ރަސޫލް (ޞޢވ) ގެ ތަފްސީރު އެހާ ސާފުކޮށް އައިސްފައިވާއިރު އަޅުގަނޑުމެންގެ ތެރެއިން އެއްވެސް މީހަކަށް ޙައްޤު ލިބިގެނެއް ނުވޭ އޭގެ މައްޗަށް ބަސްބުނުމުގެ. އަދި އޭގެ އިތުުރުން ނަބީ (ޞޢޥ)ގެ ޙަދީޘެއް ރިވާވެގެން އައިސްފައިވާ އިރު (މިކަމާ ބެހޭ ގޮތުން އެތައް ޙަދީޘެއް އައިސްފައިވާ އިރު) އޭގެ މައްޗަށް އަޅުގަނޑުމެން ބަސް ބުނުމަކީ ރަސޫލް (ޞޢވ)ގެ ބަސްފުޅަށް އީމާންވާ ހައިސިއްޔަތުން އެއްގޮތަކަށް ވެސް ޙައްޤުވެގެންވާ ކަމެއް ނޫން" ޝެއިޚް ޒަމްޒަމް ފާރިޝް ވިދާޅުވިއެވެ.
މީގެ އިތުރުން ޝެއިޚް ވިދާޅުވީ ނަބީއްޔާ(ޞޢވ)ގެ ޙަދީޘްފުޅުގެ އިތުރުން، މިޔުޒިކަކީ ޙަރާމް އެއްޗެއް ކަމުގައި، ވޭތުވެދިޔަ ގާތްގަނޑަކަށް 14 ޤަރުނުގެ ތެރޭގައި 50 ވަރަކަށް ޢިލްމުވެރިން ޢިޖްމާޢު ނަގުލު ކުރައްވާފައިވާ ކަމަށެވެ.
އެހެންކަމުން މިޔުޒިކް ޙަރާމް އެއްޗެއްގެ ގޮތުގައި ﷲ ތަޢާލާ އެކަލާނގެ ރަސޫލާއަށް، އަދި އެކަލޭގެފާނު އެކަލޭގެފާނުގެ ޞަޙާބީންނަށް ބަޔާންކޮށްދެއްވާފައި ވަނިކޮށް، އެއާމެދު އެހެން ޙުކުމެއް ބަޔާން ކުރުމަކީ އަޅުގަނޑުމެންނަށް އެއްވެސް ގޮތަކަށް ޙައްޤު ލިބިގެންވާ ކަމެއް ނޫން ކަމުގައި ޝެއިޚް ޒަމްޒަމް ފާރިޝް ވިދާޅުވިއެވެ.
