އާބާދީގެ ބޮޑު ބަޔަކަށް ވެކްސިން ދީ އިޒްރޭލުގައި މާސްކު އެޅުން ނިމުމަކަށް
އާބާދީގެ ބޮޑު ބަޔަކަށް ކޮވިޑް-19 އިން ރައްކާތެރިވުމަށް ވެކްސިން ދީ އިޒްރޭލުގައި މިއަދުން ފެށިގެން މާސްކު އެޅުން މަޖުބޫރު ކޮށްފައި އޮތް އޮތުން އުވައިލައިފިއެވެ.
މާސްކު އެޅުން މަޖުބޫރު ކުރުން އުވާލުމުގެ އިތުރަށް، ކޮވިޑް-19 ފެތުރެން ފެށި ފަހުން ފުރަތަމަ ފަހަރަށް އެ ގައުމުގެ ސުކޫލްތައް ވެސް ވަނީ މުޅިން ހުޅުވާލައިފައެވެ.
ބޭރުގެ މީޑިއާތަކުން ރިޕޯޓް ކުރާ ގޮތުގައި އެ ގައުމުގައި ބޭރުގައި އުޅޭއިރު މާސްކު އެޅުން މަޖުބޫރު ނުވި ކަމުގައި ވިޔަސް މީހުން ގިނަ ތަންތަނަށް ދާ ނަމަ މާސްކު އަޅާން ޖެހެއެވެ. އަދި މަޖުބޫރު ނޫނަސް އެ ގައުމުގެ ހެލްތު މިނިސްޓްރީން އަދިވެސް ލަފާ ދެނީ މާސްކު އަޅައިގެން ބޭރު ތެރޭގައި އުޅުމަށެވެ.
މީގެ އިތުރުން، އެގައުމުގައި ހުރިހާ ގްރޭޑުތަކަކަށް ސުކޫލްތައް ވަނީ ހުޅުވާލާފައެވެ. އެގޮތުން ދަރިވަރުން ކުލާހުގައި ތިބެން ޖެހޭނީ މާސްކު އަޅައިގެންނެވެ. ނަމަވެސް ޖިމް ގަޑީގައި އަދި ކާ ވަގުތުގައި މާސްކު ބޭލޭނެއެވެ. އަދި ދެ ގަޑި ދޭތެރޭގައި ވެސް މާސްކު އަޅާކަށް ނުޖެހޭނެއެވެ.
އިޒްރޭލަށް ވަނީ ކޮވިޑް-19ގެ ތިން ވަނަ ރާޅުގެ އަސަރު ވެސް ވަރަށް ބޮޑަށް ކޮށްފައެވެ. އެ ދުވަސްވަރު ސީރިއަސް މިންވަރަކަށް މީހުން ފައްސިވިއެވެ. ނަމަވެސް އެ ގައުމުގެ ސަރުކާރުން ވަަނީ ހަރުކަށި ފިޔަވަޅުތައް އަޅައި ބަލި ކޮންޓްރޯލް ކުރުމުގައި މުހިންމު ދައުރެއް އަދާ ކޮށްފައެވެ.
މިއަދު އެގައުމުގެ އާބާދީގެ ދެބައިކުޅަ އެއްބަޔަށްވުރެ ގިނަ މީހުންނަށް ވެކްސިން ޖަހާފައިވާއިރު ފައްސިވާ މީހުންގެ އަދަދު ވަނީ އިންތިހާއަށް ދަަށަށް ގޮސްފައެވެ.
