އިންޑިއާ "ރަތް ލިސްޓް" އަށް
ކޮންޓްރޯލެއް ނެތި ހަލުވިކަމާއެކު އިންޑިއާގައި ކޮވިޑް-19 ފެތުރެމުން ދާތީ، އިނގިރޭސި ވިލާތަށް ދަތުރުކުރުން މަނާ ގައުމުތަކުގެ "ރަތް ލިސްޓް"އަށް އިންޑިއާ ލައިފިއެވެ.
ހެލްތު ސެކްރެޓަރީ މެޓް ހަންކޮކް ވިދާޅުވީ، އިންޑިއާ ރަތް ލިސްޓަށް ލާން ނިންމީ ކޮވިޑް-19 އިން ރައްކާތެރިވުމަށް އެޅި ފިޔަވަޅެއްގެ ގޮތުން ކަމަށެވެ. ރަތް ލިސްޓަށް ލުމާއެކު، އިންޑިއާއާއި އިނގިރޭސިވިލާތާ ދެމެދުގެ ހުރިހާ އުދުހުންތަކެއް ހުއްޓާލާނެއެވެ، އަދި އިންޑިއާއިން އިނގިރޭސިވިލާތަށް އެތެރެވުން މަނާ ވާނެއެވެ. ރަތް ލިސްޓަށް ލުމަށް ފަހު އިންޑިއާއިން އިނގިރޭސިވިލާތަށް ދެވޭނީ ހަމައެކަނި ހުއްދަ އޮންނާނީ އިންޑިއާއިން ދަތުރުކުރާ އިނގިރޭސި ރަށްވެހިންނާއި އަޔަލޭންޑް މީހުންނަށް އެކަންޏެވެ. އަދި މިފަރާތްތައް ވެސް 10 ދުވަހު އިނގިރޭސިވިލާތުގެ ސަރުކާރުން ކަނޑައަޅާ ތަނެއްގައި ކަރަންޓީނުވާން ޖެހެއެވެ.
ތަފާސް ހިސާބުތަކުން ދައްކާ ގޮތުގައި މިދިޔަ މާރިޗް މަހުގެ 25 އިން ފެށިގެން، އިންޑިއާއިން އިނގެރޭސިވިލާތަށް އެތެރެވި މީހުންގެ 4.8 އިންސައްތަ މީހުން ވަނީ ކޮވިޑް-19އަށް ފައްސިވެފައެވެ.
އިނގިރޭސި ވިލާތުން ރަތް ލިސްޓަށް ލައިފައިވާ ގައުމުތަކުގެ ތެރޭގައި އިންޑިއާގެ އިތުރުން ޕާކިސްތާނާއި ބަނގްލަދޭޝް ވެސް ހިމެނެއެވެ. އިންޑިއާގައި ކޮވިޑް-19 ހަލުވި ކަމާއެކު ފެތުރެމުން ދާތީ، އިނގިރޭސި ބޮޑުވަޒީރު ބޮރިސް ޖޯންސަން އިންޑިއާއަށް ކުރައްވަން ހަމަޖެހިފައިވާ ދަތުރު ވެސް މިހާރު ވަނީ ކެންސަލް ކޮށްފައެވެ.
އިނގެރޭސިވިލާތުގެ އިތުރުން، އިތުރު ބައެއް ޤައުމުތަކުން އިންޑިއާއަށް ދަތުރުކުރުން މަނާ ކުރަމުން ދާއިރު، ކޮވިޑް-19 ކޮންޓްރޯލް ކުރުމަށް އިންޑިއާގެ ނިއު ދިއްލީ 7 ދުވަހަށް ލޮކްޑައުން ކޮށްފައިވާކަން ފާހަގަ ކޮށްލެވެއެވެ.
