ވަރުގަދަ ދެ ނަޝީދުގެ ކޯޅުން: ތަޅުމުން އުފެއްދި ހޫނުކަން ފިނިކުރާނެ ގޮތެއް ނެތް!

ކޮވިޑާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުގައި އޮލިމްޕަހާއި އެހެނިހެން ސިނަމާތައް ބަންދު ކުރި ނަމަވެސް ރާއްޖޭގެ އެންމެ ބޮޑު "ސިނަމާ" ހުރީ ހުޅުވައި އަޅައިލާފައެވެ. ހަފްތާގެ މެދު ތިން ދުވަހު ބަރާބަރަށް ޝޫޓިންތައް ކުރިއަށް ދެއެވެ. ޑައިރެކްޓަރާ ޕްރޮޑިއުސަރ އަދި އެކްޓަރުން އެ މީހުންގެ ޒިންމާ ބަރާބަރަށް އަދާ ކުރަމުން ދެއެވެ.

Ads by MWSC

ޢިއްޒަތްތެރީންގެ ޢިއްޒަތަށް ޓަކައި "ޑްރާމާ"އެކޭ ދަންނަވާކަން ނެތީމެވެ. އެއީ ރައްޔިތުންގެ ޙައްޤުގައި ކުރާ ވަކާލާތެވެ. ވިދާޅުވާ ބަހެވެ. ތަޅުމުގައި ޒުވާބުކޮށް ގަޔަށް އަތްލައި ހެދިޔަސް ، ތަޅުމުން ބޭރުގައި އެކުވެރިކަމާއެކު ހީ ސަމާސާކޮށް ހަދިޔާބަދިޔާ ބަދަލު ކުރުމީ ރިވެތި ސިފައެއް ނޫން ހެއްޔެވެ؟ ވަކިވަކި ޕާޓީތަކަށް ނިސްބަތްވީ ނަމަވެސް އެކުވެރިކަމާއެކު ބަސްބުނެ އުޅުމީ އުފަލެއް ނޫން ހެއްޔެވެ؟

ނަމަވެސް މި އެކުވެރިކަން އެއްވެސް ގޮތަކަށް ނުފެންނަ ދެ މެމްބަރަކު މަޖިލީހުގައި އެބަތިއްބެވިއެވެ. ފްލޯގެ ހޫނުކަން އެ ދެބޭފުޅުންގެ މެދުން ކެނޑިގެން ނުދެއެވެ. މި ދެންނެވީ އެންމެ "ދެކޮޅުވެރި" ދެ ނަޝީދުގެ ވާހަކައެވެ. މައްޗަށްގޮޅީ މެދު ދާއިރާގެ މެމްބަރު ، ރައީސް މުޙައްމަދު ނަޝީދާއި ނޮޅިވަރަމް ދާއިރާގެ މެމްބަރު މުޙައްމަދު ނަޝީދު ޢަބްދުﷲ (މޮސްޓާ)އެވެ.

ތަޅުމުގައި ރުޅިވެރިކަން ބޮޑު 

މަޖިލީހުގައި މޮސްޓާއަކީ ރައީސް ނަޝީދަށް ހޫނު ބަހުގެ ހަމަލާތަކެއް ދެއްވާ ބޭފުޅެކެވެ. މި ސަރުކާރަށް އެންމެ ބޮޑަށް ފާޑު ކިޔޭ ލާދީނީ އެމްޑީއެންގެ މައްސަލައާއި ވެންޓިލޭޓަރާއި ގުޅިގެން ހިނގައި ދިޔަ ކޮރަޕްޝަންތަކުގެ ވާހަކަތަކަކީ ކޮންމެ މައުޟޫއެއްގައި ވިޔަސް މޮސްޓާގެ ދުލަށް ފަރިތަ ވާހަކަ ތަކެކެވެ.

މީގެ އިތުރުން ރައީސް ނަޝީދަށް ތުރާފުޅުވި ، ތަޅުމުގައި ޤުރުއާން ކިޔެވުމުގެ ކަންތައް ވެސް އުފަންވީ މޮސްޓާގެ ކިބައިންނެވެ. ސޫރަތުލް މުނާފިގޫންއަށް އިޝާރާތްކޮށް މުނާފިގު ސޫރަތޭ ވިދާޅުވުމުން ރައީސް ނަޝީދު އެކަން ރަނގަޅު ކުރެއްވިއެވެ. ނަމަވެސް އެ ސޫރަތާ ގުޅޭގޮތުން ރައީސް ނަޝީދު ދެން ދެއްކެވި ވާހަކަފުޅުތަކުގައި ވެސް ގޯސް މައުލޫމާތުތަކެއް ވިދާޅުވިއެވެ.

ފްލޯއިން ބޭރުގައި ވެސް ހޫނުކަން 

ފްލޯ ނިމިގެން މެމްބަރުން ބައްދަލުވެލާ އުޅޭ ކުޑަދަށާއި ސައިކޮޓަރިތަކުގައި އާންމުކޮށް ފެނިގެން ދަނީ އެކުވެރި މާހައުލެކެވެ. ނަމަވެސް ދެ ނަޝީދުގެ މެދުގައި ކަންތައް އޮތީ މުޅީން ތަފާތު ކޮށެވެ.

"ދެން" އަށް ދެއްވި އިންޓަވިއުއެއްގައި މޮސްޓާ ވިދާޅުވީ އޭނާގެ ޙަޔާތުގައި ދުވަހަކު ވެސް ރައީސް ނަޝީދާ ވާހަކަ ނުދައްކާ ކަމަށާއި ،  ރައީސް ނަޝީދު ވެސް އޭނާއާ ބަސްފުޅެއް ވިދާޅު ނުވާ ކަމަށެވެ.

" (އެމްޑީޕީގެ) މެމްބަރުން ހަމަ ވަރަށް ގާތްކޮށް އުޅޭނީ (ތަޅުމުން ބޭރުގައި) ، ދެން ތިބޭނެ ރައީސް ނަޝީދުގެ ވަރަށް އަރިސް ބޭފުޅުން ، އެމީހުން ތިބޭނީ ތުއްފިއްތައިގެން" މޮސްޓާ ވިދާޅުވިއެވެ.

މޮސްޓާ ވިދާޅުވީ އޭނާ ބިލަކަށް ވާހަކަ ދައްކަވާއިރު ނޫނީ ވަޒީރަކާ ސުވާލު ކުރާއިރު ވެސް މައުޟޫއާ ނުގުޅޭ ކަމަށް ވިދާޅުވެ ހުއްޓުވާ ކަމަށާއި ނަމަވެސް އެހެން މެމްބަރުންނަށް ބޭނުން ވާހަކައެއް ދެއްކެވުމަށް ރައީސް ނަޝީދު ފުރުސަތު ދެއްވާ ކަމަށެވެ.

މޮސްޓާ ވިދާޅުވީ ރައީސް ނަޝީދާ ދެމެދު ޒާތީ އެއްވެސް މައްސަލައެއް އެ މަނިކުފާނުގެ ނެތް ކަމަށާއި އެހެންނަމައީހީ އެމަނިކުފާނުގެ ޒާތީ ދިރިއުޅުއްވުމާ ގުޅިގެން ދެކެވޭ ވާހަކަތައް ވެސް ތަޅުމުގައި ދެއްކެވީސް ކަމަށެވެ.

"ދެން ނޭނގެ އެކޮޅުން (ރައީސް ނަޝީދު) ދެކޭ ގޮތެއް " މޮސްޓާ ވިދާޅުވިއެވެ.

މޮސްޓާ ވިދާޅުވީ އޭނާއާ ދެކޮޅު 86 މެމްބަރުން ތިބެފައި އޭނާ އެކަނި މަޖިލީހުގައި އިންނެވި ނަމަވެސް ވިދާޅުވާން ޖެހޭ ވާހަކައެއް ވިދާޅުވުމުގައި ފަސް ނުޖެހޭނެ ކަމަށެވެ.

މިއީ ވަރުގަދަ ދެ ނަޝީދުގެ ގުޅުމެވެ. ހިތްތިރި ރައީސް ނަޝީދާއި ޖެހިލުން ކުޑަ މޮސްޓާ ނަޝީދުގެ ވާހަކައެވެ. ޑްރާމާ ބޮޑު މަޖިލީހުން ފެންނަ މަދު ޙަގީގަތެއްގެ ތެރެއިން އެއް ޙަގީގަތެވެ.